13.maí 2012

Vormót Léttis var haldið á Hlíðarholtsvelli í gær (laugardag).  Vegna slæmrar veðurspár fyrir sunnudag var mótinu þjappað saman á einn dag.  Vignir og Kata tóku þátt í mótinu.  Hér að ofan má sjá Vigni á Auði í fjórgangi þar sem hann endaði 5. í A úrslitum með 6.40 (forkeppni 6.03).  Vignir fékk öðlinginn Gjafar lánaðan hjá Freyju (mynd til hægri) og fór með hann í fjórgang og tölt. Þeim gekk ágætlega og náðu inn í B úrslit í báðum greinum.  Þeir riðu aðeins B úrslit í tölti og enduðu þar í öðru sæti með 6,89.

13. maí 2012

Þá er fyrsta folald ársins fætt. Esja Sól kastaði jarpri hryssu i fyrradag.  Folaldið er undan Blæ frá Torfunesi og hefur hlotið nafnið Emma í höfuðið á langalangömmu sinni, Emmu frá Bakka. 
 

13. maí 2012

Pipar frá Litlu Brekku var sýndur í Þýskalandi í síðustu viku.  Hann hlaut 8.09 fyrir byggingu og 8.10 fyrir hæfileika og endaði í 8.09.  Sýnandi var Julie Christiansen frá Danmörku en hún og maðurinn hennar keyptu Pipar af okkur síðastliðið haust.
 

13.maí 2012

Nú er sauðburður hafin í Litlu Brekku. Hann byrjar hægt og rólega.  Nú eru fimm af tólf bornar en það er spurning hvort þær ryðji lömbunum ekki úr sér í þessu kuldahreti sem nú gengur yfir landið.

3. maí 2012

Michaela frá Austurríki sendi okkur þessa skemmtilegu mynd af henni og stóðhestinum Djarfi frá Litlu-Brekku þar sem þau svamla í litlu vatni nærri heimili hennar.

22. apríl 2012
   
Á laugardaginn fyrir viku var heistaveislan Fákar og fjör haldin í Top Reiter höllinni á Akureyri.  Sýningin var mjög skemmtileg og atriðin fjölbreytt.  Meðal skemmtiatriða var hrossarekstur, 70 hrossa, í gegnum höllina þar sem reiðmenn tóku lagið, fóru í hestakaup og frumtömdu tryppi. Margir gæðingar komu langt að en meðal þeirra var Aron frá Strandarhöfði.  Aron og Hinrik Bragason voru virkilega flottir á sýningunni.

22. apríl 2012
 
Við áttum fjögur hross á Fákar og fjör.  Katrín Birna reið Prinsessu frá Garði í opnunaratriðinu ásamt Fanndís Viðarsdóttur sem var á Amöndu Völu frá Skriðulandi. Einnig sýndi Vignir Auði, Spóa og Lygnu.  Auk þess sýndi Þórhallur Þorvaldsson hryssuna sína Hildi frá Litlu Brekku sem er efnileg fimmgangshryssa undan Sámi frá Litlu Brekku og Hremmsu frá Borgarhóli.  Katrín Birna og Fanndís eru á mynd til vinstri en Þórhallur og Hildur eru til hægri.

22. apríl 2012

Smá fréttir af tamningatryppum og mönnum. Pyngja frá Litlu-Brekku (4v.) er í tamningu hjá Bjarna Jónassyni og gengur ágætlega, auðveld og skemmtileg fimmgangshryssa. Vignir fór með Lygnu (6v.) í þjálfun til Bjarna sl. þriðjudag og kíkti á Pyngju í leiðinni. Þórhallur í Yzta-Gerði var með Leynd Álfsdóttur (4v.) og Pistil Molason (5v.) í tamningu í tvo mánuði en við sóttum þau sl. laugardag. Lalli fékk annað verkefni en það er Embla Andvaradóttir (5v) sem hann ætlar að hafa fyrir okkur allavega í einn mánuð.

9. apríl 2012

Opna æskulýðsmót Léttis og Líflands var haldið á laugardaginn í Top Reiter höllinni á Akureyri.  Freyja mætti þar með Gjafar frá Syðra-Fjalli í barnaflokk. Þau hafa áður keppt saman en nú var það í fyrsta skipti að Freyja mætti sem eigandi hestsins.  Freyja átti nefnilega afmæli á þriðjudaginn og fékk hestinn að gjöf frá fjölskyldunni. Hún var alsæl að fá þennan góða félaga að gjöf. Katrín Birna keppti á Prinsessu frá Garði sem hún hefur verið að þjálfa í vetur.  Þær stöllur áttu góðan dag og unnu bæði tölt og fjórgang unglinga.  Freyja og Gjafar eru á fyrstu myndinni en Kata og Prinsessa á hinum tveimur.

4. mars 2012

Vignir og Kata skelltu sér á Ís-landsmótið á Svínavatni í gær. Þetta var virkilega skemmtilegt mót hjá Húnvetningum og ekki skemmdi frábært veður. Mikið var af flottum hrossum. Kata fór með Prinsessu í tölt og B-flokk, Vignir mætti með Spóa, Auði og Lygnu. Spói stóð sig best af okkar hrossum og komst í úrslit í A-flokki með 8,38 og endaði í 6. sæti.

14. febrúar 2012

Það fórst fyrir að segja frá folaldasýningu Framfara sem haldin var í TopReiterhöllinni á Akureyri, laugardaginn 28. janúar.  Þar var Loki frá Litlu-Brekku, undan Pistli frá Litlu-Brekku og Líf frá Litlu Brekku, valinn annað flottasta hestfolaldið af dómurum.  Einnig var hann ásamt Berglindi frá Skriðu kosinn flottasta folald sýningarinnar af áhorfendum. 

12. febrúar 2012

Fyrr í  dag var LOKSINS komið að því að Freyja og Bjarney tækju inn reiðhestana sína.  Þær skunduðu upp í fjallhólfið eftir hádegi og náðu í Gjafar og Pjakk. Þeir verða járnaðir á næstu dögum fyrir stelpurnar og verða eflaust eitthvað notaðir líka við tamningar.
 

12. febrúar 2012
 
     Lygna í útreið í janúar
Nú er keppnistímabilið að byrja.  Vignir náði tveimur mótum í vikunni.  Hann fór með Auði á KEA mótarröðina á fimmtudagskvöldið og síðan fór Kata með pabba sínum til Ólafsfjarðar í gær á ístöltmót.  Kata keppti þar á Prinsessu frá Garði en Vignir fór með Lygnu og Auði.  Þeim gekk ágætlega með þær allar en Lygna var sú eina sem náði á verðlaunapall og endaði í þriðja sæti í töltinu eftir að hafa farið upp úr B-úrslitum.

24. janúnar 2012

Við smelltum nokkrum myndum í dag af 4 vetra hryssunum okkar sem Vignir er að dunda við þessa dagana. Myndirnar hér fyrir ofan eru af Leynd dóttir Álfs og Lífar. Hún er ekki mikið gerð ennþá en fer vel af stað.

Þetta er Pyngja. Hún er undan Stála frá Ytri-Bægisá og Prinsessu frá Litla-Dunhaga.

Það var nú orðin ansi dimm hríðin þegar Jónína myndaði síðustu hryssuna. Þetta er Spyrna dóttir Álfs og Sigurdísar frá Hólabaki.

10. janúar 2012
Útreiðar ganga vel á þessum bæ enda er reiðfæri búið að vera frábært.  Hulda Lilý er farin í verknám frá Hólaskóla en það eru samt enn 11 hross á járnum.  Vignir og Kata hafa því sinnt útreiðum frá áramótum.  Kata sér alfarið um þjálfun á Prinsessu frá Garði en aðstoðar pabba sinn með restina.  Við vorum búin að lofa myndum en erum búin að reyna nokkrum sinnum að smella af en birtan hefur bara gefið okkur dökkar og leiðinlegar myndir sem ekkert gaman er að setja inn á síðuna. Við höldum áfram að reyna.
 

12. desember 2011

Jæja við höfum nú verið ansi löt við að setja inn efni undanfarið en vonandi fer það nú að lagast. Við tókum slatta af hrossum inn fyrir um 10 dögum síðan og erum búin að járna ca. 10 stk. Hulda Lilý ætlar að vera með okkur í tamningunum í desember en hún er komin í jólafrí frá Hólaskóla. Við segjum svo frá því á næstu dögum hvaða hross eru kominn inn og vonandi náum við nokkrum nýjum myndum af þeim þrátt fyrir skammdegið og stuttan birtutíma. Meðfylgjandi mynd er af bóndanum að þrífa húsið áður en tekið var inn.

1. nóvember 2011

Við sóttum Pyngju (jörp) og Spyrnu úr tamningu til Lalla og Söru í Ysta-Gerði á laugardaginn.  Þær eru báðar á fjórða vetri og tóku tamningu vel.  Það verður spennandi að taka þær inn aftur um áramót.  Pyngja er undan Prinsessu frá Litla-Dunhaga og Stála frá Bægisá en Spyrna er undan Sigurdísi frá Hólabaki og Álfi frá Selfossi. 

1. nóvember 2011

Við smelltum nokkrum myndum af Danna um helgina.  Hann er fimm vetra foli undan Deríu frá Engimýri og Gaumi frá Auðsholtshjáleigu. Danni er stór (146 cm) og mjög meðfærilegur. 

1. nóvember 2011

Árni í Dunhaga kom við á föstudaginn og snyrti kindurnar okkar.  Við verðum með 15 kindur í vetur sem eru komnar með ágætis aðstöðu í gamla bragganum. 
 

Blær                                 Eldur                                Þristur (mynd Hulda Geirs)
Þá eru allar hryssur komnar heim og fylfullar skv. sónarskoðunum. Hremmsa er að vísu óskoðuð ennþá en hún var hérna heima hjá Pipar frá Litlu-Brekku. Hérna er listi yfir þær hryssur sem við héldum og stóðhestana sem þær fóru undir:

Esja Sól frá Litlu-Brekku (8,27)      Blær frá Torfunesi (8,55)
Stilla frá Litlu-Brekku (8,08)           Eldur frá Torfunesi (8,37)
Röskva frá Hólavatni (7,89)            Eldur frá Torfunesi (8,37)
Elding frá Litlu-Brekku (7,85)          Karl frá Torfunesi (3v. ósýndur)
Líf frá Litlu-Brekku                         Karl frá Torfunesi (3v. ósýndur)
Brynja frá Árbæ (8,14)                  Þristur frá Feti (8,27)
Dería frá Engimýri  (7,66)              Þristur frá Feti (8,27)
Hremmsa frá Borgarhóli (7,32)       Pipar frá Litlu-Brekku (7,81)

28. september 2011

Fyrir um viku síðan fórum með tvær 3v. hryssur til Lalla og Söru í frumtamningu. Þetta voru þær Pyngja frá Litlu-Brekku og Spyrna frá Hólabaki. Pyngja (mynd til vinstri) er dóttir Stála frá Ytri-Bægisá (8,41) og Prinsessu frá Litla-Dunhaga (8,03). Spyrna (mynd í miðju) er dóttir Álfs frá Selfossi (8,46) og Sigurdísar frá Hólabaki (8,23). Það stóð til að fara með Leynd frá Litlu-Brekku líka (mynd til hægri) en henni tókst að fá spark í afturfót á vondann stað og er heima hjá okkur í sjúkrameðferð. Leynd er undan Álfi frá Selfossi og Líf frá Litlu-Brekku. Meðfylgjandi eru gamlar myndir er þessum þremur hryssum.

23. september 2011
 
Það hefur verið aðeins hreyfing í sölumálum hjá okkur þó enginn hasar í gangi. Myndirnar hér að ofan eru af hrossum sem við höfum nýverið selt. Myndin lengst til vinstri er af merfolaldinu  Efemíu undan Hrímni frá Ósi og Esju Sól frá Litlu-Brekku. Nýr eigandi heitir Ketill Björnsson í Reykjavík. Stóðhesturinn Pipar (miðjumynd) er leið til Danmerkur og Ljónslöpp (mynd til hægri) á leið til Svíþjóðar. Við óskum nýjum eigendum til hamingju með hrossin og vonum að þau reynist vel.
 

23. september 2011

Göngur og réttir fóru fram um laugardaginn 10. september í blíðskaparveðri. Myndirnar hér að ofan eru teknar í Reystarárrétt þar sem okkar fé kemur til réttar. við vorum heppin og fengum allar okkur kindur heim. Fjölskyldur okkar voru að sjálfsögðu mættar í réttina til að draga í dilkinn.

6. september 2011

Við tókum Lygnu uppá myndband um síðustu helgi. Hægt er að horfa á það hér. New video of Lygna. Pipar frá Litlu-Brekku er nú auglýstur til sölu hjá okkur sjá nánar hér.
LYGNA AUGLÝST TIL SÖLU SJÁ HÉR. LYGNA FOR SALE more information !

23. ágúst 2011

Lygna (5v.) frá Litlu-Brekku fór í kynbótadóm á Melgerðismelum um síðustu helgi. Lygna stóð sig frábærlega vel og fór í flottar tölur. Hún hlaut 8,31 fyrir byggingu og þar af 9,0 fyrir háls og herðar og prúðleika. Fyrir hæfileika fékk hún 7,98, þar af 8,5 fyrir tölt og fegurð í reið. Aðaleinkunn 8,11 og efsta sæti í sínum flokki og efst allra hrossa á sýningunni ásamt Bjarklind frá Húsavík. Bjarni Jónasson bóndi á Narfastöðum sýndi Lygnu fyrir okkur og gerði það snilldarlega eins og hans er von og vísa. Guðrún og Valgeir í Glæsibæ voru svo almennileg að taka video og myndir af Lygnu. Hér má sjá videóið á Youtube   Lygna_on  YouTube 
 

10. ágúst 2011

Vignir, Freyja og Kata skruppu með nokkur hross og fellihýsið á hið árlega Einarsstaðamót. Mótið var frábærlega skemmtilegt eins og alltaf. Fullt af góðum hrossum og skemmtilegu fólki og veðrið klikkar bara ekki. Vignir fór með Auði frá Ytri-Hofdölum í tölt og B-flokk. Þau komust í úrslit í B-flokki með 8,41 (bæði í forkeppni og úrslitum) og enduðu í 7. sæti. Kata og Prinsessa enduðu í 5. sæti í þrælsterkum unglingaflokki með 8,38 bæði í forkeppni og úrslitum. Freyja og Gjafar kepptu í barnaflokki og áttu fína sýningu en náðu ekki úrslitum að þessu sinni. Við vorum ekki með myndavélina með okkur í þetta skiptið en Sigga Stína í Skriðu sendi okkur myndirnar af Auði og Prinsessu sem hún tók á mótinu.

24. júlí 2011

Við tókum tvo daga í reksturinn heim.  Áður en við lögðum af stað á sunnudeginum frá Melgerðismelunum á Kaupangsbakkana tóku stelpurnar þátt í móti sem Funi og Léttir héldu fyrir börn og unglinga.  Systurnar tóku allar þátt og voru sáttar eftir daginn.  Bjarney keppti í pollaflokki á Pjakki (t.v.) sem hún er með í láni hjá Gunnari og Grétu, vinafólki okkar úr Húnavatnssýslunni. 

24.júlí 2011

Heiðar Kató Finnsson bróðursonur Vignis kom í sveitina á föstudaginn og fékk að vera einn dag i sveitinni (foreldralaus).  Hann er mikill bóndi og vill helst vera í dráttarvélinni og sinna skepnunum og annarri útivinnu.  Hann hefur í gegnum tíðina verið einn dyggasti lesandi heimasíðunnar okkar og því við hæfi að setja eina mynd af honum á Pjakki.

16. júlí 2011

Við lögðum af stað í rekstur á miðvikudaginn með vinum og nágrönnum, alls voru 58 hross í túrnum.  Fyrsta daginn riðum við í Glæsibæ, næsta dag á Kaupangsbakkana og í gær enduðum við á Melgerðismelum.  Reksturinn gekk hratt fyrir sig fyrsta daginn en síðan hefur hann runnið ljúft og börnin hafa því getað tekið þátt.  Við reiknum með að leggja af stað heim á morgun, sunnudag.

14. júlí 2011

Það eru fleiri en mannfólkið sem leggur á hesta hér á bæ. Birta (hundurinn) fékk aðstoð frá Kötu og Freyju við að leggja á hana Perlu hennar Bjarneyjar (fjólubláan rugguhest).  Þær systur tóku mynd af "reiðtúrnum" og sendu hana síðan inn í myndasamkeppni hjá unglingablaðinu Júlíu.  Systurnar sáu það síðan í blaðinu í dag að þær hefðu unnið matarpakka handa Birtu fyrir bestu mynd mánaðarins.

13. júlí 2011
Við rákum tryppin upp í fjall í dag og notuðum tækifærið á meðan við höfðum þau heima við og mynduðum nokkur veturgömul tryppi.

Berglind frá Eiðisvatni IS2010235299 er feiknastór og myndarleg hryssa undan Dyn frá Hvammi (8,47) og Lind frá Erpsstöðum (8,06).  Þessa hryssu eigum við í félagi við Fornhagabændur.

Dans frá Litlu Brekku IS2010165010 er stór og þroskamikill foli og einstaklega ljúfur í umgengni.  Hann er undan Eyjólfi frá Feti (8,11) og Deríu frá Engimýri.

Happafengur frá Litlu Brekku IS2010165007 er gríðarstór og öflugur foli.  Hann er undan Auð frá Lundum (8,46) og Hremmsu frá Borgarhóli.
 

Leiknir frá Litlu Brekku IS2010165006 er snaggaralegur og hreyfingamikill foli.  Faðir er Eyjólfur frá Feti (8,11) og móðir er Líf frá Litlu Brekku.

Elva frá Litlu Brekku IS2010265005 er falleg og ljúf hryssa.  Faðir er Álfur frá Selfossi (8,46) og móðir er Esja Sól frá Litlu Brekku.

11. júlí 2011
Hin árlega bæjakeppni Framfara var haldin á Björgum á laugardaginn.  Þetta er alltaf skemmtilegt mót þar sem margir taka þátt sem aldrei eða sjaldan hafa keppt áður.  Þeir kjósa yfirleitt að skrá sig í bændaflokk.  Inn á milli eru líka miklir reynsluboltar sem skrá sig í kvenna- eða karlaflokk.  Það var vel mætt frá Litlu-Brekku.  Allir skráðu sig til keppni nema frúin sem var á myndavélinni.

 
Bjarney og Ljónslöpp kepptu í svokölluðum teymingarhópi.  Þær höfðu Vigni með sér inn á brautina.  Valgeir Bjarni Hafdal mætti hestlaus á mótið og var fljótur að skrá sig í keppni þegar honum bauðst Ljónslöpp.  Það gekk bara vel hjá honum þó hann hefði aldrei áður prófað merina.

 
Hulda Lilý mætti með Hildi (6 vetra) en Kata prófaði Lygnu (5 vetra) á vellinum.

Freyja og Gjafar ná vel saman og hafa verið að reiðnámskeiði alla vikuna.  Parið mætti að sjálfsögðu saman í brautina.  Þau enduðu þriðju í úrslitum.

Vigni tók Auði frá Ytri-Hofdölum með sér í Björg og endaði efstur í karlaflokki.

Síðast en ekki síst má nefna að Jónína Sverrisdóttir á Björgum 4 keppti fyrir hönd Litlu-Brekku i þessari bæjakeppni. Hún sigraði og fáum við því að geyma farandbikarann fyrir bændaflokkinn næsta árið hér í brekkunni.

10. júlí 2011


Fjölskyldan skellti sér á landsmót í Skagafirði og það var nú meiri hestaveislan og reyndar alveg frábært mót í alla staði. Bjarni Jónasson sýndi Stillu fyrir okkur og gekk það bara ágætlega og endaði hún með 8,08 í aðaleinkunn. Tvær efstu myndirnar eru af Stillu og Bjarna sem teknar voru þegar Stilla fylgdi Gígjari í afkvæmasýningu, síðan koma nokkrar myndir af Stillu sem við tókum af henni hér heima áður en við drógum undan henni og fórum með hana undir stóðhest. Við ákváðum að halda henni undir Eld frá Torfunesi sem er á tveimur neðstu myndunum. Eldur er 4 vetra stóðhestur og ein af stjörnum Landsmótsins að okkar mati. Við fórum reyndar líka með Röskvu frá Hólavatni undir hann.

26. júní 2011

Á þriðjudaginn byrjaði Hulda Lilý Sigurðardóttir að vinna hjá okkur við tamningar hálfan daginn. Á meðfylgjandi myndum sem teknar voru í blíðunni í gær er Hulda að þjálfa Hildi Sámsdóttur og Ljónslöpp.

18. júní 2011

Það er búið að vera ferlega kalt hér norðanlands undanfarið og hefur kuldagallinn oft komið að góðum notum þrátt fyrir að komið sé fram í júní.  Folöldin hafa sum því fengið hálfkuldaleg nöfn eins og hún Ísing sem sést á myndinni hér að ofan.

16. júní 2011

Það er gaman að fylgjast með því hvað dætur Esju Sólar, þær Elva (veturgömul) og Efemía (folaldið), halda mikið saman.   Það er mikill leikur í þeim báðum og sést oft til þeirra hlaupa og kljást saman.  Esja Sól fór austur í Torfunes í morgun undir stóðhestinn Blæ frá Torfunesi. 

16. júni 2011

Stilla fór aftur í dóm á Akureyri í síðustu viku.  Gaman er að segja frá því að hún hækkaði bæði í hæfileikum og byggingu.  Hún fór í 8.02 fyrir byggingu og 8.10 fyrir hæfileika og 8.07 í aðaleinkunn.  Hún er því komin inn á landsmót.  Bjarni Jónasson sýndi hryssuna á Akureyri og mun einnig sýna hana á landsmóti.  Myndina tók Anna Guðrún í Fornhaga.

15. júní 2011

Tveir Gígjarssynir litu dagsins ljós sjöunda júní.  Dería kastaði brúnstjörnóttum hesti og er hann í eigu Garðars Lár.  Við náðum ekki að mynda þau mæðgin áður en Dería fór suður á land undir Þrist frá Feti.  Röskva (sú skjótta) kastaði litfögrum og myndarlegum hesti en hann hefur verið nefndur Rektor. 

15. júní 2011

Ólga frá Engimýri kastaði merfolaldi undan Kvisti frá Skagaströnd 5. júní.  Hryssan er tvístjörnótt og hringeyg á báðum.  Hún hefur verið nefnd Ísing.

14. júní 2011

Þann sjötta júní fæddist brúnn hestur undan Líf og Pistli.  Hann hefur verið nefndur Loki og er hinn myndarlegasti hestur.  Líf virðist ætla að gefa okkur falleg hross.

14. júní 2011

Hesturinn undan Hremmsu og Pistli frá Litlu Brekku sem fæddist 29. maí hefur verið nefndur Hrollur enda fæddist hann í kuldatíð.

14. júní 2011
 
Nú eru allar hryssurnar kastaðar.  Elding var síðust í röðinni en hún kastaði á hvítasunnudag.  Heimilisfólkið var svo upptekið þann daginn af fermingu frumburðarins að það uppgötvaðist ekki fyrr en daginn eftir.  Faðir þessa brúna merfolalds er Kapall frá Kommu.

31. maí 2011
Vignir fór með fjórar hryssur á kynbótasýninguna á Dalvík um síðustu helgi. Auk þess sýndi Lalli í Ysta-Gerði hann Pipar.

Prinsessa (7v) frá Garði hlaut 7,89 fyrir byggingu, 8,08 fyrir hæfileika og 8,01 í aðaleinkunn. Hún fékk ma. 8,5 fyrir tölt, vilja og fegurð í reið.

Auður (7v) frá Ytri-Hofdölum hlaut 7,87 fyrir byggingu, 7,88 fyrir hæfileika og 7,87 í aðaleinkunn. Hún hlaut ma. 8,5 fyrir tölt, vilja, fegurð í reið og hægt stökk og 9,0 fyrir brokk.

Stilla (5v) frá Litlu-Brekku hlaut 7,89 fyrir byggingu, 7,83 fyrir hæfileika og 7,85 í aðaleinkunn. Þessi hryssa á mikið inni að okkar mati og stefnum við á að sýna hana aftur í sumar.

Lygna (5v) frá Litlu-Brekku fór í byggingadóm og hlaut í einkunn 8,13. Hún fékk ma. 8,5 fyrir háls, samræmi og prúðleika. Við stefnum á að sýna hana í fullnaðardóm í sumar en síðasta mánuð hefur verið múkk vesen á henni en það er nú nánast horfið.

Pipar (5v) frá Litlu-Brekku hlaut 8,09 fyrir byggingu, 7,61 fyrir hæfileika og 7,80 í aðaleinkunn. Í byggingu hlaut hann meðal annars 8,5 fyrir háls, bak og lend og samræmi. Pipar var ekk alveg að gera sig og kom í ljós að hann var aumur í hóf og stakk við. Við vonumst til að hægt verði að sýna hann aftur í sumar.

17.maí 2011

Hildur frá Litlu-Brekku var eini þátttakandinn frá Litlu-Brekku á Vormóti Léttis um síðustu helgi.  Guðrún ákvað að skella sér með hryssuna í fjórgang.  Þetta er frumraun Hildar á keppnisvellinum og gekk sýningin bara ágætlega.  Þær stöllur voru nálægt því að komast inn í  úrslit í flokknum "minna vanir" en þær voru næstar inn. 

16. maí 2011

Esja Sól kastaði jörpu merfolaldi um eittleytið í nótt.  Faðir folaldsins er Hrímnir frá Ósi.  Það verður síðan spennandi að sjá hvort folaldið heldur jarpa litnum eða verður grátt eins og pabbinn.

10. maí 2011

Það mætti halda á fyrri myndinni að eitt af lömbunum hafi sloppið úr krónni en þegar betur er að gáð er það hún Birta okkar sem nýtur þess að grafa sig niður í heyið.  Hún er mjög svipuð á stærð og í hára- og holdafari og lömbin. 

10. maí 2011

Sauðburður hófst í gær þegar tvær elstu kindurnar í hópnum báru.  Tveir hrútar og ein gimbur komin.  Nú fer fjörið að byrja.

 
5.5.2011

Pipar frá Litlu-Brekku er stóðhestur á 5. vetur undan Hróðri frá Refsstöðum og Prinsessu Baldursdóttur frá Litla-Dunhaga. Hann er núna í þjálfun hjá Lalla og Söru í Ysta-Gerði og er stefnt á að sýna hann í vor. Sara tók meðfylgjandi myndir af Lalla og Pipar fyrir nokkrum dögum þar sem þeir tóku létta æfingu á túninu. 

26. apríl 2011

Vignir og Auður frá Ytri-Hofdölum í góða veðrinu í gær.

26. apríl 2011

   Freyja og Gjafar frá Syðra-Fjalli      Kata og Hildur frá Litlu-Brekku

Freyja þjálfar eingöngu Gjafar þessa dagana en það er rúm vika síðan hann var tekinn inn.  Kata hefur ekki tekið neitt inn sérstaklega fyrir sig en fær að prófa hrossin sem eru á húsi.   

26. apríl 2011

Það er alltaf gaman þegar fer að vora.  Þá taka heimasæturnar inn hross fyrir sig og þá verður þar af leiðandi líflegra í hesthúsinu.  Bjarney hefur tekið ástfóstri við Ljónslöpp sem við festum kaup á síðastliðið haust.  Hún er aðeins farin að ríða út í reiðskemmunni og á hlaðinu.  Á myndinni fyrir ofan sést Bjarney kemba Ljónslöpp mjög íbyggin á svip. 

24. apríl 2011

Birta og Bjarney                             Freyja og Gjafar

Guðrún og Kvika                     Kata og Prinsessa

Stelpurnar okkar tóku þátt í Líflandsmótinu sem fram fór í Reiðhöllinni í gær. Þetta var flott mót hjá Létti og Líflandi sem gekk vel fyrir sig.  Freyja fór með Gjafar í barnaflokk en hann var tekinn inn fyrir viku síðan :).  Katrín Birna fékk Prinsessu frá Garði lánaða hjá pabba sínum og náði úrslitum í bæði fjórgangi og tölti.  Guðrún Dögg náði einnig að komast í úrslit í fjórgangi og tölti á Kviku frá Glæsibæ og endaði önnur í fjórgangi.  Bjarney tók þátt í mótinu á sinn hátt, hélt fjörinu uppi á áhorfendapöllunum og var helsti styrktaraðili sjoppunnar.

20. apríl 2011

Smelltum nokkrum myndum af Hildi frá Litlu-Brekku og Guðrúnu. Hildur er 6v. hryssa undan Sámi frá Litlu-Brekku og Hremmsu. Skemmtileg hryssa sem er í góðri framför þessa dagana.

17. apríl 2011

Vignir fór með þrjár hryssur á Fákar og fjör í Top Reiterhöllina á Akureyri í gær.  Hann sýndi Prinsessu frá Garði í atriði sem kallaðist Alhliða hross, Stillu frá Litlu Brekku í 5 v. hryssum og síðan Auði frá Ytri-Hofdölum í atriði sem kallaðist Klárhryssur.  Myndirnar af merunum eru í sömu röð og þær eru nefndar hér að ofan.

22. mars 2011

Á sunnudaginn fórum við upp að Þverbrekkuvatni ásamt sveitungum okkar.  Þar var dorgað í gegnum ísinn og rennt sér á þotum og sleðum.  Freyja náði að landa einum með Idu skólasystur sinni (mynd til vinstri) og Kata öðrum sem hún miskunnsamlega sleppti.  Bjarney og Jakobína vinkona hennar dorguðu líka en þegar enginn beit á fyrstu mínúturnar var eins gott að finna sér eitthvað annað að gera (mynd til hægri).  Annars tók Vignir þátt í fimmgangi í KEA mótaröðinni síðastliðinn fimmtudag.  Hann vann sér inn sæti í A úrslitum eftir að hafa borið sigur úr býtum í B úrslitum.  Þar enduðu hann og Prinsessa frá Garði í fjórða sæti. 

13. mars 2011

Vignir fór með tvær hryssur í töltið á Mývatn Open í gær þær Auði frá Ytri-Hofdölum (u Lísu frá Koti og Goða frá Auðsholtshjáleigu) og Prinsessu Orradóttir frá Garði. Það gekk bara vel og náði Prinsessa 4. sæti í töltinu (6,50 í forkeppni og 6,63 í úrslitum) en Auður náði ekki úrslitum og fékk 6,0. Stebbi Friðgeirs sigraði töltið á Saumi frá Syðra-Fjalli. Það var líka keppt í stóðhestakeppni en þar sigraði rýmisklárinn Blær frá Torfunesi.  Gummi og Helga á Akureyri sendu okkur þessar myndir (Auður tv) og kunnum við þeim bestu þakkir fyrir. Hérna eru svo nokkrar videoklippur (youtube) sem Guðrún tamningakona tók af hryssunum.
Prinsessa hægt tölt   hratt tölt  
Auður hægt tölt  hratt tölt
Svo eru margar flottar myndir af mótinu inn á vef Berglindar og Vignis á Húsavík.

1. mars 2011

Guðrún og Pipar æfa stökk og brokk á baug.

28. febrúar 2011

Hérna koma tvær myndir af Bastían frá Litlu-Brekku. Bastían er stóðhestefni sem við eigum í félagi með Arnari og Önnu í Fornhaga en hjá þeim dvelur folinn í góðu yfirlæti. Þau sendu okkur þessar myndir af kappanum. Bastían sýnir allan gang, er kattmjúkur og fluggengur og virkilega gaman að sjá hann hreyfa sig.

IS2010165002 Bastían frá Litlu-Brekku
Kynbótamat 122
F. Kvistur frá Skagaströnd 8,58
FF. Hróður frá Refsstöðum 8,39
FM. Sunna frá Akranesi 8,16
M. Brynja frá Árbæ 8,14
MF. Leiknir frá Vakurstöðum 8,28
MM. Bringa frá Feti 8,66

18. febrúar 2011

Hér koma nokkrar tamningamyndir frá því í dag. Efri myndirnar þrjár eru af Vigni og Stillu 5v. u. Gígjari og Syrpu. og Neðri myndirnar tvær eru af Lygnu og Guðrún. Lygna er 5v. undan Sámi og Líf frá Litlu-Brekku. Veðrið er búið að vera alveg frábært í dag, sól og stilla. Í kvöld er svo Bautatöltið. Vignir ætlar að skreppa með Prinsessu og prófa hana á ísnum.

10. febrúar 2011


Þá er Skör seld en nýr eigandi er ræktunarbú í Hollandi og er hún á leið þangað á næstu dögum. Undan Skör eigum við flottann Klettsson en núna er hún fylfull við Glym frá Innri-Skeljabrekku. Við óskum nýjum eigendum til hamingju með frábæra hryssu.

8. febrúar 2011

Guðrún Sveinbjörnsdóttir er byrjuð að vinna hjá okkur við hestana part úr degi. Hún býr í Glæsibæ II hjá Rikka og Kristjönu og er að temja hjá þeim.  Á myndinni má sjá hana á Greifa frá Ytri-Hofdölum sem er nýr foli í okkar eigu.  Þessi foli var taminn í einn mánuð sl. haust og var svo tekinn inn aftur fyrir um viku síðan. Vignir sá Greifa á Laufskálarétt í haust og varð strax hrifinn af klárnum enda er hann gríðar stór og myndarlegur. Greifi er undan Hrafnari frá Ytri-Hofdölum sem er Marskússonur undan Lísu frá Koti. En mörg af okkar hrossum eru komin út af Lísu.

8. febrúar 2011

Nú er Freyja búin að taka Ljónslöpp inn.  Hún hefur aðallega verið að æfa sig í reiðskemmunni og kynnst þannig þessari nýju meri í rólegheitum.  Freyja og Ljónslöpp fengu skemmtilega heimsókn á sunnudaginn.  Kara og merin hennar, Dimma, komu í heimsókn.  Eins og sjá má á myndinni er "örlítill" hæðarmunur á merunum.

24. janúar 2011

Við höfum nú verið ansi léleg að setja inn fréttir upp á síðskastið. En vonandi förum við að hrökkva í gang :) Útreiðar hafa gengið ágætlega og vonandi komumst við fljótlega í að mynda tryppin sem við erum að þjálfa núna svo við getum kynnt þau hér á síðunni. Vignir hefur verið að þjálfa ein 5 hross og svo hafa verið 2 hross hjá Lalla og Söru í Yzta-Gerði. Núna eru hjá þeim Gandálfur frá Syðra-Kolugili sem er brúnskóttur graðfoli á 4. vetur undan Gammi frá Steinnesi og Spói frá Litlu-Brekku sem er brúnn geldingur á 6. vetur undan Ofsa frá Brún og Syrpu frá Ytri-Hofdölum. Vignir hefur svo verið að þjálfa Prinsessu, Stillu sem er Gígjarsdóttir á 5. vetur, Pipar sem er ógeltur Hróðssonur á 5. vetur og Sámsdæturnar Lygnu og Hildi. En meira um þessi hross fljótlega. Látum fylgja hér myndir af vonarstjörnunni Kapli frá Kommu sem við eigum 1 hlut í. Þessar myndir er tekin af honum sl. sumar af Einar Gíslasyni á Húsavík. Kapall er stóðhestsefni á 3. vetur undan Kjarnorku frá Kommu sem er m.a. móðir Kappa frá Kommu. Faðir hans er Álfur frá Selfossi.  

6. desember 2010

Kindurnar eru líka komnar í nýju aðstöðuna. Smám saman höfum við síðan týnt dót úr stíunum í hesthúsinu þannig að það er farið að líkjast hesthúsi aftur en ekki geymslu.  Svo fer að líða að því að tekið verður inn.  

6. desember 2010

Nú eru hænurnar fluttar inn í nýja kofann. Þær virðast vera mjög ánægðar með bústaðinn.  Allavega hafa þær orpið mjög vel á nýja staðnum.  Kofinn er nú staðsettur í gamla bragganum en ætlunin er að setja kofann út næsta sumar.  Ungarnir fimm sem við fengum óvænt í haust eru nú orðnir mjög stórir eins og sjá má á myndinni til hægri.   Við gátum með vissu kyngreint þá fyrir nokkru en það reyndust aðeins vera tvær hænur í ungahópnum.

23. nóvember 2010

Snjórinn er kominn!!!  Hann kom seint en í miklu magni loksins þegar hann kom.   Snjósleðinn sem fjölskyldan festi kaup á í haust var búinn að standa fulllengi óhreyfður en var fyrst hreyfður að einhverju ráði um þar síðustu helgi þegar við brugðum á leik á túninu með nágrönnum okkar á Ósi.   Nú þurfum við að vera vakandi yfir útigangnum sem hefur aðeins nýtt sér það að girðingar eru á kafi í snjó.  Sleðinn hefur komið að góðum notum við að eltast við hestana. 

7. nóvember 2010

Við bættum við möl í reiðskemmuna í gær og sléttuðum með aðstoð frá Einari í Hvammi. Vignir er því búinn að vera með malarhrífuna og slétta alla helgina á milli þess sem hann smíðar með Garðari.  Bjarney notaði tækifærið í morgun og náði í hjólhestinn sinn og prófaði undirlagið.  Það lofaði góðu.  Alla veganna náði hún að sleppa að nota hjálparadekk í fyrsta skiptið.  Við höfum síðan ekki gert það upp við okkur hvaða yfirborðsefni við fáum okkur.  Við auglýsum hér með eftir hugmyndum :). 

7. nóvember 2010

Það var hálfgert leiðindaveður í síðustu viku.  Folaldshryssurnar fengu sínar fyrstu heyrúlllur upp í hólf.  Þær virtust því fegnar enda bæði blautt og kalt. Það eru tvö folöld með einkenni hestahóstans núna og annað þeirra með hor í nös. Þau virðast þó vera spræk og við höfum ekki gert neinar ráðstafanir með þau.  

5. nóvember 2010
Það mjakast í framkvæmdum utandyra og ýmislegt hefur gerst á síðustu dögum:
Stóra hurðin komin á skemmuna og Bjössi búinn að setja upp ljósin.


Búið að steypa braggann og verið að setja saman spil og garða fyrir kindurnar.

28. október 2010

Ýmir (th) er kominn til Færeyja til Bjarna Arnarsonar og fjölskyldu og Sokka (tv) er á leið til Svíþjóðar til Katrinar Wilberg.

25. október 2010

Stíurnar í hesthúsinu eru yfirfullar þó ekki séu neinir hestar inni. Það kemur til vegna framkvæmda í gamla bragganum en þar ætlum við að steypa gólfið.  Hænsnakofinn var til að mynda rifinn en hænsnagreyin fengu eina stíuna til afnota á meðan þær bíða eftir nýjum húsakynnum (sjá mynd til hægri).  Á myndinni til vinstri má sjá Vigni og Axel Grettis koma frárennslisrörum fyrir en Axel mætti á laugardaginn með litla gröfu og gróf fyrir rörunum.  Gott að eiga góða granna.

25.oktber 2010

Nú er búið að klæða bæði reiðskemmuna og millibygginguna.  Enn er þó opið inn í skemmuna að norðan en stóra hurðin sem á að vera þar kemur vonandi upp í vikunni.

25.október 2010

Það gengur vel með hænuungana.  Þeir eru sprækir allir fimm og orðnir nokkuð stórir.  Ennþá er erfitt að sjá hvers kyns þeir eru en það verður gaman að fylgjast með því hvernig það breytist á næstu vikum.

13 október 2010

Í gær sóttum við Emblu til Lalla og Söru í Ysta-Gerði en þar hefur hún verið í frumtamningu í mánuð. Embla er Andvaradóttir á fjórða vetur, afar þæg hryssa og auðveld en fremur gangsöm. Við ákváðum að þetta væri orðið gott í bili og slepptum henni út í milt haustveðrðið. Við fórum með ótaminn fola á fimmta vetur til þeirra í frumtamningu. Sá heitir Danni frá Litlu-Brekku og er undan Gaumi frá Auðsholtshjáleigu og Deríu. Danni er feikna stór foli og mældist í vor um 146 cm á herðar með stangarmáli. Við fórum líka með Lygnu. Lygna er hryssa á fimmta vetur sem við gerðum reiðfæra í fyrra vetur. Lalli og Sara keyptu af okkur tvö 4 vetra tryppi, Eldjárn Gígjarsson og Leikni Sámsdóttur sem er alsystir Lygnu. Þau fara vel af stað í tamningu og eru bæði einstaklega þæg og auðveld. Meðfylgjandi mynd var tekin af Danna áður en hann var teymdur upp í kerru í gær á leið í skólann sinn.

12. október 2010

Nú eru smiðirnir byrjaðir að klæða reiðskemmuna.  Þá fer aldeilis að koma mynd á hana.  Freyja stóðst ekki freistinguna og mátaði skemmuna um síðustu helgi. 

2. október 2010

Skör frá Litlu-Brekku auglýst til sölu.

2. október 2010

Nú er búið festa langböndin á bogana og það styttist óðum í að Kötlumenn klæði skemmuna.  Það er mikil lofthæð á húsinu sem gnæfir yfir aðrar byggingar á landareigninni.  Skemman er  því í rauninni tilvalin aðstaða fyrir badmington og blak yfir vetrarmánuðina.  Reiðskemman gæti endað sem fjölnota "íþróttahöll".  Alla veganna verða keyptir spaðar :).

1. október 2010

Það er alltaf gaman að fá góðar fréttir af hrossum sem við höfum selt frá okkur. Djarfur (mynd til hægri) unir hag sínum vel í Austurríki. Michaela og Djarfur tóku þátt í sinni fyrstu keppni nú í september í Austurríki og náðu 6,53 í fjórgangi og fyrsta sæti. Þræðing (mynd til vinstri) tók einnig þátt í sinni fyrstu keppni í sumar ásamt eiganda sínum Birnu Ósk Ólafsdóttur. Þær kepptu á Reykjavíkurmeistaramótinu og enduðu í öðru sæti í fjórgangi barna með einkunnina 6,50.

29.09.2010

Við fengum óvæntan glaðning í síðustu viku þegar við sáum að fimm ungar leyndust í gamla hænsnakofanum.  Ein hænan hefur laumast inn í gamla kofann einhvern tímann í sumar og orpið þar sex eggjum en hún náði að unga út fimm.  Lengi var beðið eftir að eitthvað kæmi úr því sjötta en nú er sú von úti.  Ungarnir eru keimlíkir og því ekki ólíklegt að þeir séu allir úr sömu uppátækjasömu hænunni.

20.09.2010
Þá er loksins búið að sónarskoða allar hryssurnar sem við héldum í sumar. En sú síðasta var skoðuð í dag. Það var hún Skör sem reyndist fylfull við Glym frá Innri-Skeljabrekku. Allar hryssurnar sem við héldum hafa verið staðfestar með fyli. Þær eru:

Elding frá Litlu-Brekku         Kapall frá Kommu
Esja-Sól frá Litlu-Brekku      Hrímnir frá Ósi
Ólga frá Engimýri                Kvistur frá Skagaströnd
Röskva frá Hólavatni           Gígjar frá Auðsholtshjáleigu
Skör frá Litlu-Brekku           Glymur frá Innri-Skeljabrekku
Hremmsa frá Borgarhóli       Pistill frá Litlu-Brekku
Líf frá Litlu-Brekku               Pistill frá Litlu-Brekku

Garðar pabbi Jónínu hélt svo Deríu frá Engimýri og er hún fylfull við Gígjari frá Auðsholtshjáleigu.

20.09.2010

Þá er loksins búið að heimta féð heim af fjalli. En í fyrri göngum fyrir rúmri viku síðan fengum við aðeins þriðjung af fénu í rétt enda lentu gangnamenn í svartaþoku og heilmikið af féi varð eftir í fjallinu. Restin skilaði sér svo í seinni göngum um síðustu helgi.

20.09.2010

Það gengur bara vel hjá þeim Kötlumönnum að byggja skemmu. Sökkullinn var tilbúinn fyrir nokkru síðan og nú er verið að reisa boganna.

15.08.2010

11. ágúst sl. var fyrsta skóflustungan tekin að reiðskemmu hér í Litlu-Brekku. Húsið er bogahýsi 16 metra breitt og 21 metra langt og mun koma í beinu framhaldi af gamla bragganum. Katla ehf. mun sjá um að reisa bygginguna.

11.08.2010

Jæja, þá er Vignir búinn að sýna Prinsessu frá Garði í kynbótadómi.  Hún fékk 7.92 þannig að ekki komst hún yfir áttuna í þetta skiptið.  Við reynum við áttuna síðar :).  Annars fórum við um síðustu helgi austur á Einarsstaði á hestamannamót Þjálfa.  Þetta er fyrsta mót fjölskyldunnar á árinu og líklegast það síðasta líka.  Vignir keppti á Prinsessu, Freyja á Gjafari og Kata á Buska.  Vignir náði 7. sæti inn í A úrslit í B-flokki og hélt því sæti í úrslitum.  Þetta var frumraun Prinsessu á keppnisvellinum þannig að við erum ákaflega stolt af henni. 

28.07.2010

Höfum verið að pússa og mála glugga og þakskegg á íbúðarhúsinu í blíðunni.  Grípum í það á milli annarra verka.  Því verður vonandi lokið fyrir haustið :).  Vignir ætlar síðan að sýna  Prinsessu frá Garði á kynbótasýningu í Skagafirði á morgun.  

27.07.2010

Kata og Vignir hafa verið dugleg að ríða út undanfarið.  Þau hafa notið góðs af því síðustu vikuna að nú eru Robbi og Hulda búin að slá og hirða túnin okkar.  Þau hafa nýtt sér rúllurnar og nýslegin túnin sem æfingasvæði.  Góð tilbreyting frá hörðum veginum.

22.07.2010

Við rákum hrossin heim í gær, klipptum hófa og gáfum ormalyf.  Hestunum var síðan sleppt í fjallið þar sem þeir munu una vel næstu mánuðina.  Reiðhrossinn eru þó enn heima við í brúkun.  Á myndinni má sjá Kötu á Gjafari að ríða á undan hestunum til að vísa veginn upp úr hólfinu í fjallið.

21.07.2010

Nú erum við loksins farin að hreyfa hrossin aftur eftir langa pásu. En það eru 2-3 vikur síðan að við byrjuðum að hreyfa þau fyrstu eftir tveggja mánaða hlé. Við höfum ekki farið í neina rekstra enn sem komið er heldur bara verið að dóla með þau í rólegheitum heima við. Meðfylgjandi eru myndir af Ými Gustssyni. Ýmir er efnilegur fimmgangshestur sem er í mikilli framför þessa dagana.

21.07.2010

Við skelltum okkur í ferðalag um síðustu mánaðarmót (í stað landsmóts).  Tókum fellihýsið með okkur og gistum í bæjunum sem við brunum alltaf í gegnum á leiðinni suður þ.e. Blönduós og Borgarnes.  Við skoðuðum bæina og þræddum öll söfn og sundlaugar sem við fundum.  Við komum einnig við á Hvammstanga og náðum að taka út Selasetrið og ullarverksmiðjuna.  Síðan brunuðum við til Reykjavíkur og kíktum á menninguna þar líka t.d. Árbæjarsafnið, Kringluna og Hamborgarafabrikkuna :).  Hundurinn Birta fékk að fara með í ferðina og gekk það ótrúlega vel.  Á myndinni eru Brekkubúar að panta eitthvað sjoppufæði og Birta ætlar greinilega að panta sér eitthvað ljúffengt.   

01.07.2010

Lítið hefur verið að gera í hestamennskunni það sem af er sumars vegna hestapestarinnar.  Þetta hefur því verið óvanalegur júnímánuður hér á bæ.  Stelpurnar hafa ekkert lagt á en hafa verið duglegar að mæta á frjálsíþróttaæfingar í sveitinni.  Nú er sú yngsta komin með aldur til að mæta og hafa þær því allar þrjár farið á sömu æfingarnar, einstaklega foreldravænt ;).  Á myndinni má sjá Freyju stökkva langstökk á aldursflokkamóti á Akureyri.  Stefanía Steinsdóttir á Rauðalæk sendi okkur þessa mynd.

23.06.2010

Ný hross á söluskrá. Endilega kíkið.

23.06.2010

Hinir árlegu Brekkuleikar voru haldnir í Litlu Brekku á þjóðhátíðardaginn.  Þar mættu til leiks foreldrar og systkini Vignis með sínum fylgifiskum og að vanda var keppt í ýmsum íþróttagreinum eins og stígvélakasti með tvöföldum snúningi og rólustökki með frjálsri aðferð.  Mikið var deilt um úrslitin enda mikið keppnisfólk þarna á ferð :).  Í lok dagskrár var keppendum boðið upp á grilluð lambalæri.  Frábær dagur eins og alltaf.

22.06.2010

Mátti til að birta hérna tvær myndir af sama hrossinu. Þetta er hún Pyngja Prinsessu og Stáladóttir sem nú er orðinn tveggja vetra. Sem folald var hún heldur lítið fyrir augað blessunin og nánast eins og Skaparinn hafi verið eitthvað utan við sig vinnunni. En í dag er þetta orðin bara hin myndarlegasta hryssa.

19. júní 2010

Í gær fórum við með 4 hryssur undir stóðhesta. Röskva fór aftur undir Gígjar frá Auðsholtshjáleigu en meðfylgjandi myndir eru af Röskvu og syni hennar u. Gígjari þegar verið var að lesta kerruna. Dería fór líka undir Gígjar en Garðar pabbi Jónínu heldur henni þetta árið. Skör frá undir vindótta gæðinginn Glym frá Innri-Skeljabrekku og Esja-Sól fór undir Hrímni frá Ósi sem fór í rosa flottan dóm í Borgarnesi nú í vor.

19. júní 2010

Sláttur hófst óvenju snemma hér í Litlu-Brekku þetta árið eða 16. júní. Róbert og Hulda bændur í Litla-Dunhaga sjá alfarið um heyskapinn hér á bæ.

16. júní 2010

Pipar frá Litlu-Brekku er stóðhestur á fjórða vetur undan Hróðri frá Refsstöðum og Prinsessu frá Litla-Dunhaga. Við gerðum þennan fola vel reiðfæran í vetur og var jafnvel stefnt á sýningu í vor þó ekkert hafi verið ákveðið. Hann fór í frí vegna kvefpestar, eins og önnur hross hjá okkur, í byrjun maí. Við slepptum honum í ungfolahólf í gær en Vignir stökk á bak áður en við drógum undan honum svo við gætum smellt af honum nokkrum myndum. Pipar var auðveldur í tamningu og er efnilegur fimmgangshestur.

15. júní 2010

Það er búið að vera frábært veður síðustu daga.  Kvenpeningurinn á bænum er kominn í sumarfrí og hefur notið þess að vera heima í blíðunni.  Birta litla er mikill félagi stelpnanna og er mjög skemmtilegt að fylgjast með henni uppgötva allt það sem fylgir sumrinu t.d. gras, úðara og drullu. Það síðastnefnda er í miklu uppáhaldi en hún er orðin þaulvön að fara í sturtu.

12. júní 2010
 
Hún á það til að stela senunni Elva litla Álfsdóttir þegar maður kíkir á folaldshryssurnar.

11. júní 2010

Skör kastaði 9. júní þessum brúna hesti undan Kletti frá Hvammi. Það eru því heldur ójöfn kynjahlutföllin hjá okkur núna eða 5-1 fyrir strákunum. Ein hryssa er eftir að kasta svo ekki er öll von úti enn að hryssunum fjölgi á bænum. Myndirnar eru teknar að dag af þeim stutta hjá móður sinni og eitthvað að brölta við ánna.

6. júní 2010

Jæja, þá erum við búin að nefna þrjú folöld í viðbót.  Jarpskjótta Esjudóttirin heitir Elva, rauðblesótti Hremmsusonurinn Happafengur og brúni hesturinn undan Líf var nefndur Leiknir. 

6. júní 2010

Vignir var sannfærður um að Röskva myndi kasta í nótt og kíkti á hana bæði klukkan 2 og 6 en ekkert gerðist.  Kata og Jónína voru fyrstar á fætur í morgun og sáu þá að eitthvað var í gangi og strunsuðu niður í hólf til Röskvu.  Þegar þangað var komið var allt yfirstaðið.  Kominn brúnstjörnóttur hestur undan Gígjari frá Auðsholtshjáleigu.  Á fyrri myndinni er stjarni litli 5 mínútna gamall en á þeirri seinni tæplega 2 klukkustunda.  Þetta er fyrsta folaldið hennar Röskvu en hún stendur sig vel í móðurhlutverkinu.

6. júní 2010

Dería kastaði brúnu hestfolaldi í fyrrinótt. Sá stutti er undan Eyjólfi frá Feti.  Stór og stæðilegur hestur með myndarlegan frampart eins og folöld undan Deríu eru gjörn á að vera.

30. maí 2010

Fengum tvö folöld í nótt.  Líf kastaði brúnu hestfolaldi undan Eyjólfi frá Feti og Esja Sól kastaði jarpskjóttri hryssu undan Álfi. Loksins fengum við skjótta litinn frá Álfi :). 

29. maí 2010

Ritstjóra síðunnar hefur borist kvörtun vegna fréttar frá 27. maí 2010.  Þar kom fram að við hefðum farið með Eldingu undir Kapal frá Kommu.  En hið eina rétta er að Einar Víðir stórfrændi Vignis var svo almennilegur að fara með hryssuna fyrir okkur.  Rétt skal vera
rétt :). Á meðfylgjandi mynd er Frændi á Freyju frá Reykjum á móti í Ásbyrgi. 

27. maí 2010

Nú er Linda komin aftur til Svíþjóðar.  Hennar bíður skrifstofustarf í heimalandinu í sumar en það verður örugglega viðbrigði fyrir þessa miklu dýrakonu.  Hún á þó tvo Schäferhunda, hest og ROTTU sem hún þarf að hugsa um samhliða skrifstofustarfinu.  Á myndinni má sjá Lindu með brot af aloaveraflöskunum sem hún drakk í tíma og ótíma og enginn annar á heimilinu gat hugsað sér að drekka.  Gangi þér vel í nýju vinnunni Linda og takk fyrir góðan vetur :).  

27. maí 2010

Fórum í gær með Eldingu undir ungfolann Kapal frá Kommu . Kapall er á húsnotkun fyrir hluthafa hjá Hirti í Hnjúkahlíð við Blönduós. Elding átti síðast folald 2007 en undan henni er til Gígjarssonur á þriðja vetur. Hún hefur síðan þá verið reiðhross/keppnishross á bænum en verður nú sett í ræktunina.

25. maí 2010

Hremmsa kastaði í nótt rauðblesóttum Auðssyni frá Lundum. Litur og útlit eins og búið var að panta en hann hefði alveg mátt vera hún :-) enda er þetta þriðji rauðblesótti hesturinn í röð hjá henni blessaðri. Vignir fór að kíkja á hrossin í morgun um 6 leytið og hafði með sér myndavél enda nokkuð viss um að Hremmsa væri búinn að kasta.  Þegar að var komið reyndist sá stutti hálf skorðaður milli þúfna og gat ekki staðið upp hjálparlaust. Hann var feginn sopanum eftir leguna en virtist hálf ringlaður og vildi ekki hreyfa sig mikið í fyrstu. Við fórum svo með þau mæðgin heim á tún en þetta er í fyrsta skipti sem Hremmsa lætur ná sér út á víðavangi en hún hefur nú ekki verið þekkt fyrir að vera nein kelirófa og heldur sig helst í minnst 100 metra fjarlægt frá manninum ef hún á þess kost. En tryppin og hinar folaldsmerarnar voru forvitnar og aðgangsharðar við þann nýfædda og virtist sem Hremmsu líkað vel við afskiptasemi mannfólksins að þessu sinni.

22. maí 2010

Jæja þá er fyrsta folald sumarsins fætt hjá okkur. Það var sameign okkar með Fornhagabændum hún Brynja frá Árbæ sem kastaði 19. maí sl. fola undan undan Kvisti frá Skagaströnd. Sá stutti sem hlotið hefur nafnið Bastían ber skemmtilegan lit en hann er brúntvístjörnóttur með hvíta leista á öllum fótum :) Meðfylgjandi myndir tók Anna Guðrún af þeim mæðginum.

5. maí 2010
 
Sýningunni Æskan og hesturinn, sem halda átti á Sauðárkróki 1. maí, var frestað vegna hestaveikinnar.  Í staðinn hélt Léttir smá sýningu, 30. apríl, á atriðunum sem búið var að æfa stíft síðustu vikur í reiðhöllinni á Akureyri.  Þátttakendurnir buðu ættingjum og vinum að koma og horfa á. Börnin hittust klukkan 18 og fóru í spurningaratleik um íslenska hestinn og borðuðu síðan pizzu saman áður en þau sýndu klukkan 20.  Þetta var mjög skemmtilegur og vel heppnaður viðburður.  Yngstu krakkarnir sýndu leikritið Nýju fötin keisarans en unglingarnir og ungmennin sýndu atriðin úr sýningunni "Fákar og fjör" frá 17. apríl.  Á fyrstu myndinni má sjá tvo skraddara (Freyju og Köru vinkonu hennar) en á þeirri næstu má sjá hirðfífl keisarans gera æfingar á hestunum sínum. Á neðri myndunum má fyrst sjá sigurvegara ratleiksins Kristínu Ellý, Kötu og Valgerði og síðan er það Bjarney okkar sem fékk að "keppa" á Gjafari í höllinni þegar hún var orðin tóm.

1. maí 2010

Stilla frá Litlu-Brekku er hryssa á fjórða vetur undan Gígjari frá Auðsholtshjáleigu og Syrpu frá Ytri-Hofdölum. Við frumtömdum hana í haust (okt.-nóv.). Hún fékk síðan gott frí og var tekin inn í byrjun febrúar og fór þá í þjálfun á tamningastöðina í Torfunesi. Vignir leit við í Torfunesi í gær og Erlingur Ingvarsson tamningamaður lagði á hana. Stilla er ganggóð og næm hryssa sem tekur tamningu vel.

28. apríl 2010

Sokka til sölu.

19. apríl 2010

Sauðburður hófst í Litlu Brekku í nótt þegar Grána bar tveimur lömbum.  Linda, hin sænska, sem kom aftur til okkar um miðjan febrúar er sérleg aðstoðarkona í sauðburðinum.  Henni er samt vægast sagt ekkert um kindur gefið en lætur sig hafa það :).  Ekki er laust við að lömbin hafi þó brætt hana í morgun eins og sjá má á myndinni hér fyrir ofan.

18. apríl 2010

Í gærkvöldi fóru Vignir og Kata með Gjafar og Prinsessu frá Garði í TopReiterhöllina til að taka þátt í svokallaðri stórveislu hestamanna "Fákar og fjör".  Kata tók þátt í atriði sem kallaðist "Ungt og efnilegt" en Vignir var með "kátum körlum" úr Létti og sýndi einnig Prinsessu í klárhryssuatriði.  Á myndunum hér fyrir ofan er Vignir á Prinsessu.

17. apríl 2010

Það hefur aðeins bæst við dýraflóruna í Litlu Brekku á undanförnum mánuði.  Nýji varðhundurinn okkar, hún Birta, kom til okkar um miðjan mars.  Birta er þriggja og hálfs mánaða hvítur púðluhundur, fjörug og kát týpa.  Hún Freyja okkar fékk síðan fiskabúr og fiska í tilefni 10 ára afmælisins.  Tandri gamli er mjög áhugasamur um fiskana og er sjálfkjörinn aðstoðarmaður Freyju í fiskeldinu.

3. apríl 2010

Gjafar er orðinn aðalkeppnishestur fjölskyldunnar og klikkar aldrei :).  Freyja hélt upp á 10. afmælisdaginn með því að keppa á honum á Líflandsmóti sem haldið var í TOP REITER höllinni  3. apríl.  Mamman klikkaði á myndavélinni en Anna Þóra á Björgum smellti af Freyju og sendi okkur þesssa mynd. 

27. mars 2010

Vignir og Gjafar í 4. sæti á móti í reiðhöllinni á Björgum þann 27. mars.

21. mars 2010

Rákum stóðið heim í dag og klipptum hófa á nokkrum hrossum. Við smelltum þessari mynd af Leynd sem er 2v. Álfsdóttir.  Okkur finnst hún einstaklega fríð og fínleg þessi hryssa.

6. febrúar 2010
Vignir og Freyja löbbuðu út í stóð í dag og höfðu með sér myndavélina enda veðrið einstaklega fallegt. Smellið á myndirnar til að sjá þær stærri.

      
Vinkonurnar Freyja og Litla-Jörp         Freyja og stóðhrossin.
     
Nei þetta er ekki ísbjarnarhrammur   Röskva sæl í sólinni
  
Pyngja og Röskva                            Sokka og Leynd
  
Hofsáin í klakaböndum                      Dalmey 3v. Gígjarsdóttir

19. janúar 2010
 
Folaldasýning Framfara var haldin á Björgum sl. laugardag. Á Björgum er risin reiðhöll um 1.000 fermetrar að stærð og var þetta fyrsti viðburðurinn sem þar fór fram. Við óskum Vidda og Ollu, Simma og Önnu Þóru og Jolla og Jónínu innilega til hamingju með glæsilega aðstöðu. Mikil skráning var á sýninguna eða um 80 folöld. Við fórum með 4 folöld en ekkert þeirra náði verðlaunasætum. Í hryssuflokknum varð efst brúnskjótt hryssa frá Syðra-Brekkukoti. Stór og myndarleg hryssa með fallega framgöngu. Á mynd til vinstri eru nágrannar okkar og eigendur hryssunnar þau Berti og Britta í Syðra-Koti. Í flokki hesta varð efstur snaggaralegur Gígjarssonur frá Möðrufelli og var hann jafnframt valinn flottasta folaldið af áhorfendum. Eigandi hans er Þorbjörn Hreinn (Lúlli) í Möðrufelli. Eigendum og ræktendum efstu folalda óskum við til hamingju með árangurinn. Nánar má lesa um úrslitin hér.  

19. janúar 2010

Katrin Wilberg frá Svíþjóð sendi okkur þessa mynd af fyrsta folaldi Snerpu frá Litlu-Brekku. Myndina tók Annika Ridington.

29. desember 2009

Við erum loksins farin að týna inn hrossin aftur. Ekkert komið á járn ennþá en þetta fer allt að koma ;-) Það er sannkallaður vetur hér í Eyjafirði og óvenju mikill jafnfallinn snjór. Michi í Austurríki sendi okkur þessa skemmtilegu mynd af henni og Djarfi, nýbúinn á námskeiðum hjá Einari Öder og Antoni Níelssyni.

23. desember 2009

Sendum okkar bestu óskir um gleðileg jól og gott og farsælt komandi ár. Þökkum samskiptin á árinu sem er að líða.

28. nóvember 2009

Gaman er að segja frá því að Litla-Brekka var þriðja árið í röð tilnefnt sem ræktunarbú ársins á svæði HEÞ. Við erum að sjálfsögðu mjög ánægð með að vera eitt af þeim búum sem tilnefnd eru. Í þetta sinn voru það Vilberg og Kristín í Kommu sem hlutu titilinn og óskum við þeim innilega til hamingju með það.
En eins og áður hefur komið fram er lítið um að vera í hestamennskunni núna á bænum því engin hross eru á járnum og því ekki farið í útihúsin nema til að sinna kindum, hænum og einni kanínu.  Linda, tamningakonan, er farin heim til Svíþjóðar en stefnir á að koma aftur til okkar einhvern tímann eftir áramót.  Við notum tímann því eins og venjulega á haustmánuðum að vinna í íbúðarhúsinu okkar.  Vignir er pískaður áfram við að mála stofuna og þvottahúsið og getur eflaust ekki beðið eftir því að taka hesta á hús :).   Á myndinni má sjá Freyju spila á harmonikkuna sína í fjósinu hjá Huldu og Robba í Litla-Dunhaga á tónleikum Tónlistarskóla Eyjafjarðar.  

28. nóvember 2009

Jæja, nú fer kjötið að verða til sem Garðar setti í reykkofann.  Bjarney og Freyja aðstoðuðu afa sinn við verkið en Garðar sér alfarið um að bæta við taði og kveikja upp.  Heimilisfólkið í Litlu-Brekku getur því gætt sér á dýrindis taðreyktu lambakjöti um jólin.  

16. nóvember 2009

Jæja það er langt síðan eitthvað hefur ratað hér inn á síðuna. Það eru svo sem rólegheit í hestamennskunni bænum. Við drógum undan og slepptum öllum hrossum um síðustu mánaðarmót og vorum þá búin að vera dunda með 4 frumtamningatryppi og nokkur eldri hross. Tryppin voru orðin reiðfær og líst okkur bara vel á þau. Allt þæg og meðfærileg hross með lausan gang. Reiknum með að taka 3 af þeim aftur inn um áramótin. Vignir og Berti nágranni í Syðra-Brekkukoti skruppu um síðustu helgi vestur í Gauksmýri. Þar var haldinn aðalfundur félagsskapar um stóðhestefnið Kapal frá Kommu. En þeir félagar eiga sinn hvorn sinn hvorn hlutinn í honum. Kapall fer á annan vetur undan Álfi frá Selfossi og Kjarnorku frá Kommu. Hann er því sammæðra Kappa og Kasper frá Kommu. Kapall er myndarlegur og vel þroskaður foli og fylgir hér mynd af gripnum. 

23. október 2009

Kíkið endilega á ný uppfærðan lista yfir "önnur hross í okkar eigu".

9. október 2009
Héldum 9 hryssum í sumar og eru þær sem betur fer allar fengnar skv. sónarskoðun. Þetta eru:

Röskva frá Hólavatni          Gígjar frá Auðsholtshjáleigu
Líf frá Litlu-Brekku              Eyjólfur frá Feti
Dería frá Engimýri              Eyjólfur frá Feti
Esja Sól frá Litlu-Brekku     Álfur frá Selfossi
Brynja frá Árbæ                 Kvistur frá Skagaströnd
Hremmsa frá Borgarhóli      Auður frá Lundum
Ólga frá Engimýri               Blær frá Torfunesi
Lind frá Erpsstöðum            Dynur frá Hvammi
Skör frá Litlu-Brekku           Klettur frá Hvammi

Tveimur af þessum hryssum er haldið í samstarfi við Önnu og Arnar í Fornhaga þ.e. Brynju og Lind. En  Lind er 1. verðlauna hryssa sem við leigðum í sumar. Hér má sjá heimasíðu eigendanna og mynd af hryssunni. Ólga frá Engimýri er hryssa í eigu Maríu Jespersen á Akureyri en við höldum henni sem sagt í ár og næsta ár. Ólga er viljug tölthryssa undan Höldi frá Brún og Pólstjörnu frá Nesi sem er fluggóð 1. verðlauna hryssa. Búið er að sýna eina hryssu u. Ólgu og er það 1. verðlauna hryssa í Danmörku.

30. september 2009

Síðasta helgi var notuð í hrossarag og þrif á útihúsum. Við rákum heim tryppi, folaldsmerar og reiðhross sem komin eru í haustfrí og gáfum þeim ormalyf og klipptum hófa. Vel hefur gengið með tryppin sem eru inni núna en það hefur verið heldur kalt og blautt undanfarna daga og tíminn því verið nýttur í annað en hrossaþjálfun. Á meðfylgjandi mynd er Linda á baki Ými frá Hítarnesi, 6 vetra Gustssyni, sem við keyptum seinni part sumars. Ýmir er þægur og meðfærilegur foli, skrefmikill og alhliðagengur en ekki mikið gerður ennþá.

24. september 2009

Nú erum við byrjuð að frumtemja tryppin sem eru á fjórða vetur ásamt því að trimma nokkur hross sem eru til sölu. Tryppin á fjórða eru fjögur talsins: Hryssa undan Gígjari frá Auðsholtshjáleigu og Syrpu, tvær hryssur undan Sámi og einn stóðhestur undan Hróðri frá Refsstöðum og Prinsessu. Erum búin að dunda í rúma viku með hryssurnar en Pipar (stóðhestinn) tókum við inn á sunnudag. Hjá okkur er sænsk stúlka, Linda Sohlberg, og hjálpar hún okkur með hestana. Á meðfylgjandi mynd er Linda að þjálfa Prýði frá Litlu-Brekku, 5 vetra hryssu undan Hrym frá Hofi og Prinsessu. Prýði er skemmtileg unghryssa, viljug og töltgeng og er hún til sölu hjá okkur.

5. september 2009

Smelltum nokkrum myndum af Þræðingu (5v. Andvaradóttir) í dag. Það er gaman að vinna með þessa hryssu. Hún er þæg og traust en vel viljug og alltaf til sama hvert maður beinir henni. Þá eru gangtegundirnar einstaklega heilsteyptar. Þetta er hryssa sem við teljum að eigi fullt erindi í keppnisbrautina. Ræktendur eru vinir okkar í Glæsibæ II þau Rikki og Kristjana. En þau eiga móðurina Þrá frá Glæsibæ. Þrá hefur gefið býsna góð hross t.d. tvær fyrstu verðlaunahryssur, Þreyju (8,02) og Þrumu (8,43). Undan Þrá eru til 5 sýndar hryssur. Fjórar þeirra hafa náð 8,5 fyrir tölt og ein hefur náð 9,0. Þrá er undan Þræði frá Nýjabæ sem var undan Sörla frá Sauðárkróki og Áshildi frá Áshildarstöðum en þau eru hálfsystkyni u. Feng frá Eiríksstöðum. Móðir Þráar er Nótt frá Hvassafelli u. Náttfara frá Ytra-Dalsgerði (Sörlasyni). Þrá er því þónokkuð mikið skyldleikaræktuð út af Sörla gamla.
Þræðing er auglýst til sölu.

2. september 2009

Árlegt Bjargarmót var haldið um liðna helgi og var það fjölsótt og skemmtilegt að venju. Kata keppti á Eldingu og Buska, Freyja á Gjafari, Vignir á Þræðingu og Jónína keppti á Gjöf.  Við tókum nokkrar myndir á mótinu en erum í einhverju brasi með "formatið" á myndunum svo við bíðum með að birta þær. Þess í stað fylgja hér myndir af mæðgum ríðandi í Einarsstaðaferðinni.

Við áttum tvær 5 vetra hryssur á síðsumarsýningum sumarsins. Brynja frá Árbæ var sýnd á Hellu en lækkaði aðaleinkunn frá þeim dómi sem hún náði 4 vetra. Hún hækkar reyndar byggingu í 8,24 en lækkar í hæfileikum og endaði með 8,11 en var með 8,14 í fyrra. Sýnandi var Erlingur Erlingsson. Svolítil vonbrigði með það en þetta eru lifandi skepnur sem eiga misgóða daga. Brynja er komin heim fengin við Kvist frá Skagaströnd og erum við afar kát með það og höfum trú að það geti orðið flott blanda. Eigendurnir skruppu á bak á henni þegar hún kom heim og urðu ekki fyrir vonbrigðum. Brynja er sjóðandi viljug , þjál og vel geng hryssa með mikinn fótaburð. Þræðing frá Glæsibæ II var sýnd á Akureyri og hlaut 7,70 í byggingu líkt og í vor en hækkaði umtalsvert í hæfileikum. Fór í 7,94 fyrir hæfileika og 7,84 í aðaleinkunn. Hún hlaut m.a.  8,5 fyrir tölt, vilja og geðslag og fegurð í reið og 9,0 fyrir stökk og hægt stökk. Sýnandi var Bjarni Jónasson.

15.ágúst 2009

Við komum heim á föstudaginn úr túrnum austur en þá höfðu hrossin okkar ekki komið heim í rúmar tvær vikur.  Ferðalagið gekk vel en þó var óvenju mikið um að laga þurfti járningar á leiðinni. Var haft á orði að menn væru hættir að svitna við járningarnar. Hrossin voru mun færri á leiðinni heim t.d. skutluðum við heim Eldingu sem hafði orðið fyrir smá hnjaski og tveimur hryssum sem stefnt er með í kynbótasýningu. Reksturinn heim gekk vel. Hrossin voru orðin rólegri og lestuðu sig fínt á eftir þeim sem undan riðu. Á mynd til vinstri er Simmi bóndi á Björgum að járna einn ferðahestinn. Fanndís heldur í og Anna Þóra fylgist með. Á mynd til hægri er Vignir að járna Þræðingu.

13. ágúst 2009

Heimilisfólkið í Litlu-Brekku tók þátt í Einarsstaðamótinu um síðustu helgi hver með sínu sniði.  Freyja, Kata og Vignir fóru í brautina en Bjarney og Jónína sáu um að hvetja í brekkunni.  Það var algjör bongóblíða á sunnudaginn og því ekki amalegt að sitja í brekkunni eins og sjá má á Bjarneyju og Brittu á mynd lengst til hægri.  Á fyrstu myndinni má sjá Kötu og Röskvu frá Hólavatni en þær enduðu í fimmta sæti í barnaflokki og síðan eru Vignir og Buski frá Bergsstöðum fyrir miðju að ríða B-úrslit í A-flokki.

6. ágúst 2009


Við riðum í Sörlastaði á mánudaginn með heimilisfólkinu í Syðra-Brekkukoti, Þrastarhóli, Björgum og Glæsibæ II ásamt nokkrum Akureyringum.  Reksturinn var mjög stór, yfir 90 hross og u.þ.b. 20 manns ríðandi.  Þetta var góður túr sem gekk vel.  Rikki í Glæsibæ II varð fimmtugur þennan dag og Valgeir sonur hans 19 ára.  Fjölskyldan bauð því upp á dýrindis grillað nautakjöt þegar við komum á áfangastaðinn í tilefni dagsins.  Við gistum á Sörlastöðum eina nótt og héldum svo túrnum áfram næsta dag en ætlunin er að enda á Einarstöðum á fimmtudag. 

3. ágúst 2009
 
Verslunarmannahelginni eyddum við á Sauðárkróki á Unglingalandsmóti.  Katrín Birna keppti þar í frjálsum og á Eldingu í fjórgangi og tölti.  Ekki veitti henni af tveimur aðstoðarmönnum, bílstjóra (mamma) og hestasveini (pabbi) því greinarnar í hestaíþróttunum og frjálsunum lentu mikið til á sama tíma og því var brunað á milli keppnissvæðanna :).  Kata og Elding komu heim með silfur og brons í tölti og fjórgangi.  Mótið gekk vel og var mjög skemmtilegt þó að það hafi verið ansi blautt á laugardaginn.  Í lok mótsins, á sunnudaginn, var haldið lítið frjálsíþróttamót fyrir 10 ára og yngri krakka sem Freyja og Bjarney tóku þátt í.

26. júlí 2009

Undanfarnir dagar hafa verið frekar rólegir og heimilisfólkið í Litlu Brekku hefur dundað sér við ýmislegt heima við.  Meðal annars smíðuðu Garðar og Vignir kofa úti í garði sem er ætlaður fyrir allt meiriháttar drullumall.  Kofann steyptu þeir niður í gær og er þegar búið að taka hann í notkun.  Fórum annan rekstrartúr í Glæsibæ II til að halda hrossunum í trimmi fyrir fyrirhugaðan túr í Einarsstaði í næstu viku.  Nú eru hryssurnar farnar að týnast heim frá stóðhestunum.  Sóttum Hremmsu í fyrradag fengna við Auð frá Lundum og Esja Sól kom heim í dag fengin við Álfi frá Selfossi :-)

22. júlí 2009

Fórum á dögunum í rekstur með vinafólki okkar í Glæsibæ II og Þrastarhóli.  Rikki í Glæsibæ II kom ríðandi til okkar ásamt fylgdarliði og við fylgdum honum heim næsta dag.  Þriðja daginn riðum við síðan frá Rikka heim með nágrönnum okkar á Þrastarhóli.  Ætlunin er að reka sömu leið fljótlega en við stefnum á lengri rekstur í ágúst.

5. júlí 2009

Nú er Lína byrjuð hjá okkur aftur og ætlar að temja hjá okkur í rúman mánuð.  Þessa dagana er því verið að járna og koma öllu í gang aftur en við höfum lítið sinnt þjálfun á undanförnum vikum.  Við fjárfestum í hringgerði frá Brimco á dögunum.  Gerðið hefur verið í mikilli notkun þann stutta tíma sem það hefur verið uppi.  Ekki spurning að það stórbætir vinnuaðstöðuna.

27. júní 2009

Nú erum við búin að halda Röskvu undir Gígjar frá Auðsholtshjáleigu. Við höfum ákveðið að gefa henni frí frá hnakknum næsta vetur en reiknum með að halda svo áfram með hana eftir það. Gígjar hefur verið að sanna sig í vor sem öflugur kynbótahestur. Sýnd voru 12 tryppi undan honum og þar af voru 9 þeirra aðeins 4 vetra gömul. Þrjú 4v. fóru í fyrstu verðlaun. Myndir frá vinstri: Röskva (Svava Jensdóttir), Gígjar (H.M.T. Peterse)

27. júní 2009
 
Skör kastaði 15. júní sl. brúnni hryssu undan Kappa frá Kommu. Sú stutta hefur hlotið nafnið Kjarnorka í höfuðið á ömmu sinni (föðurmóður) og er þar með búið að rjúfa þá hefð hjá okkur að upphafsstafur afkvæmis sé sá sami og hjá móður. En þar sem öll afkvæmi Syrpu (móður Skarar) byrja á S fannst okkur rétt að finna annan upphafstaf fyrir afkvæmi Skarar. Kjarnorka er frekar smá en býsna pattaraleg og fer aðallega um á tölti. Skör er á leið undir hinn skrefmikla gæðing Klett frá Hvammi. Myndir frá vinstri: Kjarnorka, Skör, Kappi (AGG).

27. júní 2009

Keyrðum þremur merum í hólf 15. júni sl.
Líf og Dería fóru í hólf á Miðgrund í Skagafirði undir Eyjólf frá Feti. Eyjólfur er 5 vetra brúnskjóttur (sokkóttur) klárhestur undan Þristi frá Feti og Álsey frá Feti. Hann var sýndur á Sörlastöðum í vor og hlaut prýðisdóm eða 8,11 og þar af 9,0 fyrir tölt og brokk. Móðir hans Álsey (Orradóttir) er viljug klárhryssa sem hlaut á sínum tíma 9,0 fyrir tölt og 9,5 fyrir hægt tölt. Þristur hefur svo verið að sanna sig sem frábær tölthestafaðir. Því fannst okkur spennandi að komast í þetta blóð. Esja-Sól (8,27) fór svo undir glæsihestinn Álf frá Selfossi (8,46). Meðfylgjandi mynd af Eyjólfi og Erlingi Erlings. frá Sörlastaðasýningunni fengum við senda frá Hinrik Má vini okkar en hann er formaður hrossaræktardeildarinnar Grána í Akrahreppi sem hefur umsjón með hestinum.

27. júní 2009

Hremmsa kastaði 10. júní sl. Afkvæmið reyndist hestur, glannablesóttur, hringeygður með leista á báðum. Taglið er svo að mestu skjannahvítt að lit. Faðir er Hróður frá Refsstöðum. Sá stutti hefur fengið nafnið Hermann. Hremmsa er farin undir glæsihestinn Auð frá Lundum. Hér fylgja svo nokkra myndir af þeim mæðginum (hægt er að smella á þær til að sjá þær stærri).

6. júní 2009

Hestfolald (til vinstri á mynd) undan Deríu frá Engimýri og Sámi frá Litlu Brekku kom í heiminn aðfaranótt fimmtudagsins 4. júní.  Þetta er stór og myndarlegur hestur sem leikur sér mikið.  Merfolaldið undan Prinsessu frá Garði og Aðli frá Nýjabæ hefur fengið nafnið Atorka.  Á myndinni til hægri er Freyja að athuga með Prinsessu og Atorku.

 31. maí 2009

Vignir sýndi Esju Sól og Þræðingu (5v. Andvaradóttir) í kynbótasýningunni á Króknum sem lauk  á föstudag. Esja Sól hlaut fyrir byggingu 8,26 og fyrir hæfileika 8,27 og 8,27 í aðaleinkunn. Hún er í raun með mjög jafnar og góðar tölur, einungis ein tala undir 8,0. Það er bak og lend uppá 7,0. Hún hlaut 9,0 fyrir fótagerð, hófa, prúðleika og skeið og 8,5 fyrir höfuð, vilja og geð og fet. Esja Sól var efst í sínum flokki og önnur hæst dæmda hryssa sýningarinnar. Við ætlum að halda Esju Sól nú í sumar og nú stendur yfir leit að heppilegum stóðhesti (góð ráð vel þegin :)). Þræðing hlaut 7,70 fyrir byggingu, 7,49 fyrir hæfileika og 7,57 í aðaleinkunn. Þræðing á mikið inni í hæfileikum og jafnvel eitthvað í byggingu en það verður framtíðin að leiða í ljós. Jakob Sigurðsson sýndi Röskvu í Hafnarfirði í síðustu viku. Hún fékk 8,33 fyrir byggingu, 7,60 fyrir hæfileika og 7,89 í aðaleinkunn. Hún er því lítið að bæta dóm frá fyrra ári og virðist hana vanta meira jafnvægi og styrk til að opna almennilega á meira rými en það á nú vonandi eftir að koma allt saman. Myndin er tekin nú í kvöld af Esju Sól. Hægt er að smella á hana til að sjá hana stærri.

26. maí 2009

Jæja þá eru kynbótasýningarnar byrjaðar á fullu og spennan í hámarki ! Djarfur var sýndur í Hafnarfirði í dag og fór í flottan dóm og hlaut 8,12 í aðaleinkunn. Þar af 9,0 fyrir tölt og vilja og geð og 8,5 fyrir brokk, stökk, fegurð í reið og hægt stökk. Djarfur hefur verið í þjálfun hjá Ingu og Tona á Feti en var sýndur af Erlingi í Langholti. Congratulation Michaela :-)

IS2004165010 Djarfur frá Litlu-Brekku
Sköpulag: 7,5 - 8,0 - 7,5 - 8,0 - 8,0 - 8,0 - 8,5 - 8,5 = 8,02
Hæfileikar: 9,0 - 8,5 - 5,0 - 8,5 - 9,0 - 8,5 - 7,5 = 8,18
Aðaleinkunn: 8,12
Hægt tölt: 8,0 Hægt stökk: 8,5
Sýnandi: Erlingur Erlingsson

24. maí 2009

Katrín Birna og Elding tóku þátt í firmakeppni Léttis sem haldin var sl. fimmtudag (Uppstigningardag). Það gekk vel hjá þeim stöllum og sigruðu þær barnaflokkinn. Meðfylgandi myndir tók Friðgeir Guðmundsson.

24. maí 2009

Um síðustu helgi var haldið Norðurlandsmeistarmótið í hestaíþróttum á Hlíðarholtsvelli. Vignir fór með þær systur Esju Sól og Eldingu. Það gekk ágætlega og í fimmgangi náðist 4.-5. sæti. Á meðfylgjandi mynd eru Vignir og Esja Sól (til vinstri) ásamt Jóni Herkovic á Formúlu að keppa til úrslita í fimmgangi. Myndina tók Friðgeir Guðmundsson sem birtir myndir sínar á heimasíðu Léttis.

21. maí 2009

Þá er fyrsta folaldið loksins komið :-)   Prinsessa frá Garði kastaði 18. maí jarpri hryssu. Sú stutta er undan Aðli frá Nýjabæ en hann verður einmitt hér á okkar svæði í sumar hjá hrossaræktarfélaginu Framfara.

Systurnar í Litlu-Brekku tóku þátt í sýningunni Æskan og hesturinn þar sem ungir knapar úr Skagafirði, Húnavatnssýslu og Eyjafirði sýndu listir sínar.  Bjarney og Freyja skiptust á að ríða á Gjafari frá Syðra-Fjalli en Katrín Birna reið á Eldingu frá Litlu-Brekku. Freyja og Kata hafa verið á vikulegum æfingum síðustu tvo mánuði fyrir þessa sýningu en Bjarney smellti sér í teymingarflokkinn eftir að vera búin að fara einu sinni á bak í vetur.  Sumir eru meira fyrir það að sýna en ríða út :).  

27. apríl

Við fórum ríðandi á kjörstað ásamt nágrönnum okkar þeim Axel oddvita á Þrastarhóli (til hægri á mynd) og Albert í Syðra-Brekkukoti (til vinstri á mynd).  Nú var í fyrsta skipti kosið í Leikhúsinu á Möðruvöllum og því bara hæfilegur reiðtúr að skreppa ríðandi á kjörstað.  Ólöf á Þrastarhóli kom ekki með okkur í þetta skiptið þar sem nýtt oddvitaefni er í ofninum :) en hún tók myndavélina með sér í bílinn og var að senda okkur þessa mynd. 

20. apríl 2009

Á laugardagskvöldið fór fram vígsla og hestasýning í reiðhöll Léttis á Akureyri. Litla-Brekka var þar með ræktunarbússýningu. Í henni tóku þátt Hinrik Bragason með Sám, Inga María Jónínudóttir með Djarf, Friðrik Már Sigurðsson með Jaðar, Katrín Birna með Eldingu og Vignir með Esju Sól. Við vorum ánægð með hvernig til tókst í frumraun okkar á þessu sviði og viljum nota tækifærið og þakka knöpunum kærlega fyrir að taka þátt í þessu með okkur. Á mynd til vinstri eru Kata og Elding í ræktunarbússýningunni en þær tóku líka þátt í opnunaratriðinum með Léttiskrökkunum. Á myndinni til hægri er Freyja ásamt nokkrum Léttiskrökkum að sýna hnakkana sem Top Reiter gaf Létti að þessu tilefni.

20. apríl 2009

Við áttum eftir að klára frásögn af suðurferð. Við heimsóttum Ingu Mæju og Tona tamningamenn á Feti en hjá þeim gistum við og vorum í góðu yfirlæti. Inga Mæja sýndi okkur Djarf frá Litlu-Brekku (5v. Þristssonur) en þau hafa verið með hann í þjálfun síðan við seldum hann fyrir um ári síðan. Djarfur er efnilegur klárhestur með tölti og er stefnt á að sýna hann í vor. Meðfylgjandi mynd er af Ingu og Djarfi.

14. apríl 2009

Í áðurnefndri suðurferð okkar litum við á tvo rauða fola sem við seldum í fyrra. Þá Hrungni frá Keldunesi (6v.) og Hróa frá Litlu-Brekku (5v.). Eigandi folanna er ungur og efnilegur tamningamaður, Bjarni Sveinsson á Selfossi og sýndi hann okkur báða hestana í reið. Folarnir eru báðir lofandi og vel unnir. Greinilega í góðum höndum hjá Bjarna. Á meðfylgjandi mynd er Bjarni á Hróa.

12. apríl 2009

Skruppum á suðurlandið með vinafólki okkar í Fornhaga 2 á föstudaginn langa og komum heim í gær.  Byrjuðum á því að koma við hjá Jakobi Sigurðssyni í Steinsholti í Leirársveit og kíktum á Röskvu okkar.  Jakob sýndi okkur hana inni í reiðskemmunni og sýndist okkur þjálfunarferlið vera á góðu róli.  Meira af ferðinni síðar.

9. apríl 2009
 
Stóri hófaklippingardagurinn var í dag. Við klipptum hófa á tryppum, folaldshryssum og nokkrum gömlum geldingum sem hafa verið úti í vetrarfríi alls 32 stk. Garðar (pabbi Jónínu) er mikill áhugamaður um íslenskar hænur. Hann smíðaði útungunarvél og nú eru komnir 10 sprækir hænuungar, sannkallaðir páskaungar.

5. apríl 2009

Hinrik Bragason keppti á Sámi frá Litlu-Brekku í fimmgangi Meistaradeildar VÍS sem fram fór í Ölfushöllinni sl. fimmtudagskvöld. Þeir félagar stóðu sig mjög vel og náðu 2.-3. sæti í forkeppni en enduðu í 5. sæti í úrslitum. Nánari umfjöllun má sjá á heimasíðu Hinna og Huldu á Árbakka, á Hestafréttum og á seisei.is. Meðfylgjandi mynd tók Fjölnir Þorgeirsson.

1. apríl 2009

Æskan og hesturinn hér norðanlands verður haldið á Akureyri 2. maí nk. Kata og Freyja eru báðar að æfa atriði í reiðhöllinni með Léttiskrökkum. Þær æfa einu sinni í viku en eru svo líka á reiðnámskeiði einu sinni í viku hjá Linu Erikson. Myndina á auglýsingunni tók húsfreyjan á bænum og er hún af Freyju og Litlu-Jörp.
 

1. apríl 2009

Röskva er komin í þjálfun til Jakobs Svavars Sigurðssonar tamningamanns í Steinsholti og er stefnt á að sýna hana í kynbótadómi í vor. Látum hér fylgja mynd af föður hennar, Prins frá Úlfljótsvatni (mynd af Prins birt með leyfi Snæbjörns á Úlfljótsvatni).
 

25. mars 2009

Vignir kom við hjá Birni bónda á Hólabaki um daginn og kíkti á sameignina Spyrnu frá Hólabaki. Spyrna er veturgömul hryssa undan Sigurdísi  (8,23) frá Hólabaki og Álfi (8,46) frá Selfossi. Sigurdís  er móðir hins kunna glæsihests Sigurs frá Hólabaki sem hefur verið að gera það gott á ísmótum í vetur. Mynd til vinstri er af Spyrnu. Myndina til hægri tók Anna Guðrún í Fornhaga af Sigurdísi og Tryggva Björnssyni.

24. mars 2009

Við höfum selt gæðingshryssuna Prinsessu frá Litla-Dunhaga. Kaupendur eru Haukur og Ragnhildur á Selfossi sem reka hrossabú að Austurási en kenna hrossarækt sína við Skeiðnes. Það er óneitanlega mikil eftirsjá í Prinsessu, en undan henni eigum við nokkurn hóp álitlegra tryppa. Við óskum nýjum eigendum til hamingju með hryssuna og vonum að hún reynist þeim vel í ræktuninni.

2. mars 2009


Við notuðum góða veðrið um helgina til að smella nokkrum myndum af Þræðingu 5v. Andvaradóttur. Þræðing er hörku efnileg klárhryssa sem Lina hefur verið að þjálfa undanfarið.

23. febrúar 2009

Meðfylgjandi myndir voru teknar fyrir viku síðan og eru af þremur veturgömlum hryssum. Myndin lengst til vinstri er af brúnskjóttri hryssu, Hendingu u. Kletti frá Hvammi og Hremmsu frá Borgarhóli. Miðjumyndin er af Emblu. Hún er undan Andvara frá Ey og Esju-Sól. Embla er auglýst til sölu á sölusíðunni. Lengst til hægri er svo mynd af brúnsjörnóttri hryssu, Dalmey u. Gígjari frá Auðsholtshjáleigu og Deríu.

23. febrúar 2009

Christina Lund, eigandi Álfs frá Selfossi, kom hingað í heimsókn í síðustu viku ásamt tveimur norskum vinkonum sínum. Þær voru á yfirreið um landið til að skoða Álfsbörn. Þær sendu okkur meðfylgjandi mynd af Leynd okkar Álfsdóttur (ljósmyndina tók Tine Johansen).

15. febrúar 2009

Það var góður dagur til útreiða í gær. Sólskin og logn og reiðfærið alveg frábært. Á meðfylgjandi myndum er Lina að "ríða út" úr hesthúsinu. Má nú ekki minna vera dyraopið.

15. febrúar 2009

Hér koma nýjar myndir af Leynd (Álfsdóttur) frá Litlu-Brekku. Leynd tók þátt í úrvalssýningu folalda á svæði HEÞ og lenti þar í öðru sæti í flokki merfolalda.

10. febrúar 2009

Vignir tók þátt í mótaröð Léttis sem fram fór í reiðhöllinni á Akureyri sl. föstudagskvöld. Hann mætti með Esju-Sól í 60 m. skeið og Þráinn í fjórgang. Hann náði 4. sæti í báðum greinum og þar með rétt til þess að taka þátt í úrslitum sem fara fram síðar. Næstu greinar sem keppt verður í eru tölt og fimmgangur og er stefnt á að mæta með jarpa gengið aftur. Mynd til vinstri er af Vigni og Esju-Sól. Á mynd til hægri færir mótsstjórinn Áslaug Kristjánsdóttir fimm efstu í skeiðinu viðurkenningu.  Lengst til hægri á mynd eru Þór og Seifur frá Skriðu, en þeir náðu besta tímanum.

4. febrúar 2009

19. janúar sl. byrjaði Lina Erikson að temja hjá okkur. Hún býr á Akureyri en kemur flesta daga og þjálfar 5-6 hross. Lina er lærður hestafræðingur og reiðkennari frá Hólaskóla.

18. janúar 2009
 
Í gær var mikið um að vera í sveitinni. Dagurinn hófst með folaldasýningu Framfara og var hún haldin hjá Hauki og Þorra á Ytri-Bægisá.  Á folaldasýningunni voru skráð til leiks um 65 folöld og gekk sýningin hratt og vel fyrir sig. Hestaflokkinn sigraði Álmur Álfssonur frá Skriðu og var hann jafnframt kosinn glæsilegasta folaldið af áhorfendum. Hryssuflokkinn sigraði folald frá okkur, Leynd Álfsdóttir. Verðlaunin voru ekki af verri endanum. 15 kg. fata af söltuðu folaldakjöti frá Benna Jensen.  Um kvöldið var svo haldin uppskeruhátíð Framfara á Melum. Mikið stuð og mikið gaman. Nú er Leynd komin á hús ásamt Líf móður sinni sem verður tamin í vetur. Við stefnum að því að koma með nýjar myndir af Leynd á næstu dögum.

15. janúar 2009

Erum búin að endurnýja lista yfir ræktunarhryssur í Litlu-Brekku. Þetta eru hryssur sem flestar eru í folaldseign en einnig hryssur sem eru í þjálfun núna og stefnt er á að fari í folaldseignir. Smellið á hrossin okkar til að skoða nánar.

14. janúar 2009

Nú færist smátt og smátt líf í hestamennskuna í Litlu-Brekku. Við erum með 8 hross á húsi núna en þar af á Axel nágranni tvö. Stelpurnar voru duglegar að skreppa á hestbak í jólafríinu. Kata reið á Þráni og Freyja á Gjafari. Hross á húsi núna eru eftirtalin: Þráinn frá Þinghóli, Gjafar frá Syðra-Fjalli, Þræðing 5v. (Andvaradóttir) frá Glæsibæ, Röskva 5v. (Prinsdóttir) frá Hólavatni, Hildur 4v. (Sámsdóttir) frá Litlu-Brekku og Saga 4v. (Gígjarsdóttir) frá Hólabaki. Meðfylgjandi mynd er af Vigni og Sögu.

14. janúar 2009

Brynja frá Árbæ er nú farin í þjálfun til Erlings og Viðju í Langholti. Stefnt er á að sýna hana aftur í kynbótadómi í vor.

10. janúar 2009
 
Uppgjör 2008 :-)  Síðast liðið ár var okkar besta ár í hrossaræktinni. Við sýndum 6 hross í kynbótadómi og þar af 4 frá Litlu-Brekku. Þetta voru Sámur (8,22), Skör (8,02), Elding (7,85) og Esja-Sól (8,21) öll frá Litlu-Brekku. Meðaleinkunn þeirra var 8,08. Einnig eigum við helming í tveimur 4v. hryssum sem sýndar voru á árinu: Prinsessu frá Garði (7,98) og Brynju frá Árbæ (8,14). Litla-Brekka var annað árið í röð tilnefnt sem ræktunarbú ársins á svæði HEÞ og erum við ákaflega stolt af því. Á meðfylgjandi mynd er Vignir að taka við blómvendi á haustfundi HEÞ ásamt öðrum sem tilnefndir voru. Fyrir valinu varð Syðra-Garðshorn í Svarfaðardal.
Þá voru Vignir, Kata og Freyja býsna ötul á keppnisvellinum og gekk það upp og niður eins og gengur en náðu oft ágætis árangri. Vignir var tilnefndur sem knapi ársins hjá Létti en Þorbjörn Hreinn Matthíasson hreppti verðskuldað titilinn. Tamningar og sala gengu afar vel. Hjá okkur var dönsk stúlka, Nanett Kvist, og á hún stóran þátt í því hversu vel gekk við tamningar og sölu. Enda bráðlagin og dugleg stelpa. Hún starfaði hjá okkur með hléum frá október 2007 - júni 2008. Á meðfylgandi mynd er Nanett á Kol frá Syðri-Ey sem er einn af þeim hestum sem við seldum á sl. ári.
 

10. janúar 2009

Hér kemur síðbúin nýjárskveðja frá fjölskyldunni í Litlu-Brekku. Við þökkum fyrir góð samskipti á liðnu ári og óskum ykkur farsældar á því nýja. Meðfylgjandi er mynd sem húsfreyjan tók yfir Akureyri um miðnætti á gamlárskvöld. Við skruppum yfir í Vaðlaheiði til að fylgjast með skothríðinni og njóta útsýnissins.

23. nóvember 2008

Þetta er mynd af óskýrðu merfolaldi sem við eigum í félagi við Björn bónda á Hólabaki. Hryssan er undan glæsihrossunum Sigurdísi frá Hólabaki (8,23) og Álfi frá Selfossi (8,46). Við höfum ekki enn séð hryssuna en Björn sendi okkur þessa mynd í dag.

27. október 2008

Við héldum 6 hryssum undir stóðhesta í sumar. 5 reyndust fengnar skv. sónarskoðun en ein var geld. Mynd til vinstri er af Skör okkar en hún er fylfull við glæsihestinum Kappa frá Kommu (mynd til hægri Kappi/AGG)

Eftirtaldar hryssur er fengnar.
Hryssa:                                        Stóðhestur:
Hremmsa frá Borgarhóli        -    Hróður frá Refsstöðum
Dería frá Engimýri                -    Sámur frá Litlu-Brekku
Prinsessa frá Garði               -    Aðall frá Nýjabæ
Skör frá Litlu-Brekku            -    Kappi frá Kommu
Prinsessa frá Litla-Dunhaga   -    Sveinn-Hervar frá Þúfu

21. október 2008

Það er heldur rólegt yfir hestamennskunni í Litlu-Brekku þessa dagana. Fjölskyldan brá sér til Mallorca í vikutíma og hafði það huggulegt í sólinni. Með okkur í för voru Anna Þóra og Simmi á Björgum ásamt börnum. Alveg frábær ferð með góðum ferðafélögum.

Allir eru nú komnir á fullt í vinnu og skóla og aukatími notaður í ýmis haustverk og framkvæmdir við íbúðarhúsið. Nú er lilla-bleika innréttingin í eldhúsinu orðin hvít þannig að húsfreyjan fékk nú loksins sínu framgengt eftir níu ára baráttu.

Við stefnum á að taka hross til þjálfunar í byrjun desember og tíminn þangað til verður nýttur til að ditta svolítið meira að íbúðarhúsinu.

Það gleymdist alveg að segja frá því hér á síðunni að Prinsessa kastaði jarpri hryssu um miðjan ágúst sl. Hefur hún fengið nafnið Pyngja. Við fórum með Prinsessu og Líf í sónarskoðun í dag. Prinsessa var hjá Sveini-Hervari og var staðfest fyl í henni. Líf var hjá Tenór frá Túnsbergi en reyndist því miður geld. Það hefur þó þann kost að nú verður hægt að temja merina en það "gleymdist" víst um árið. Hún var gerð reiðfær á fjórða vetur en lenti svo í folaldseignum hjá okkur og er búin að gefa okkur 3 hryssur, 2 undan Sámi frá Litlu-Brekku og eina undan Álfi frá Selfossi.

21. september 2008

Svava Jensdóttir sendi okkur þessar flottu myndir af Röskvu og móður hennar, Veru frá Hólavatni (th).

17.september 2008

Nýverið keyptum við hryssuna Röskvu frá Hólavatni. Röskva er 4 vetra, bráðefnileg hryssa, rauðskjótt að lit. Hún er undan Prins frá Úlfljótsvatni og Veru frá Hólavatni sem er ósýnd hryssa undan Magna frá Búlandi (u. Sörla Búlandi). Röskva var sýnd í sumar og hlaut 8,31 fyrir sköpulag, 7,44 fyrir hæfileika og 7,81 í aðaleinkunn. Fyrri eigandi hennar er Kristófer Helgi Pálssson á Hvolsvelli. Kristófer og kona hans Svava Jensdóttir halda úti heimasíðu um sína hrossarækt á slóðinni www.holavatn.com. Myndina til hægri tók Svava. Myndina til vinstri tók Jens Einarsson á Héraðssýningu á Gaddstaðaflötum sl. vor. Knapi er Elvar Þormarsson. Jens skrifar einnig skemmtilega frétt um þessa hryssu á heimasíðu sinni www.seisei.is . Fréttina má nálgast hér. Við hlökkum til að taka Röskvu inn til þjálfunar í vetur og stefnum á að sýna hana í vor.  Hægt er að smella á myndirnar til að sjá þær stærri.

10. september 2008

Djarfur frá Litlu-Brekku hefur fengið heimasíðu. Þar má sjá myndir og ýmsar upplýsingar um klárinn á þýsku. Djarfur er 4v. stóðhestur u. Þristi frá Feti og Deríu frá Engimýri. Hann er enn staðsettur á Íslandi og er stefnt á að sýna hann að vori. Inga og Toni í Syðra-Holti, nú tamningamenn á Feti eru með klárinn í þjálfun. Eigandi Djarfs er Michaela Schwandl frá Austurríki. Kíkið endilega á síðuna, slóðin er  www.djarfur.at.tf

2. september 2008


Meðfylgjandi myndir eru af Sóma Syrpusyni og fósturfjölskyldu hans. Dería gekk Sóma í móðurstað og ganga því tvö folöld undir henni. Það hefur gengið vel að venja þau saman. Við höfðum þau inni fyrstu sólarhringana, tókum bæði folöldin undan henni og hleyptum þeim báðum í einu til hennar með nokkuð reglulegu millibili allan sólarhringinn. Dería tók þessu vel frá upphafi og leið ekki á löngu þar til hún virtist sætta sig við þetta. Sómi litli fylgir fóstru sinni hvert fótmál og er duglegur að bjarga sér.

31. ágúst 2008

Vignir sýndi Esju Sól á Síðsumarsýningu á Sauðárkróki í vikunni. Hún hlaut flottan dóm: Sköpulag 8,24 og hæfileikar 8,18, Aðaleinkunn 8,21. Við erum að sjálfsögðu stolt af Esju Sól og þessari frumraun hennar á kynbótabrautinni. Hún verður í þjálfun aftur næsta vetur og er stefnt á kynbótasýningu næsta vor. Esja Sól er 6v. undan Núma frá Þóroddsstöðum og Elju frá Ytri Hofdölum. Hún var tamin lítilsháttar á fjórða vetur, átti svo folald í fyrra og var tekinn inn eftir áramót. Undan henni er til veturgömul Andvaradóttir. Meðfylgjandi mynd er af heimasíðu Léttis en hún var tekin á Einarsstaðamótinu í 100 metra skeiði þar sem hún lenti í 3. sæti með tímann 8,54 sek.

IS2002265005 Esja Sól frá Litlu-Brekku
Litur: 3400 Jarpur/rauð- einlitt 
Sköpulag: 8,5 - 8,0 - 6,5 - 8,5 - 9,0 - 7,5 - 8,5 - 9,0 = 8,24
Hæfileikar: 8,0 - 8,0 - 8,5 - 8,0 - 8,5 - 8,0 - 8,0 = 8,18
Aðaleinkunn: 8,21
Hægt tölt: 7,5      Hægt stökk: 5,0

 31. ágúst 2008
 
Tókum þátt í þremur mótum í ágústmánuði.  Vignir fór með hálfsysturnar Esju Sól og Eldingu til Dalvíkur á opið íþróttamót.  Hann náði úrslitasætum í tölti, fjórgangi og fimmgangi og í gæðingaskeiði fóru hann og Esja Sól heim með gullið.

Helgina 9.-10. ágúst fór fjölskyldan til Einarsstaða með fellihýsið þar sem Vignir, Kata og Freyja tóku þátt í keppni.  Þeim gekk öllum ágætlega en það sem stóð líklega upp úr eftir helgina var að Freyja (8 ára) og Litla-Jörp (25 vetra) komust inn í úrslit.  Þær enduðu í 7. sæti og Kata í því 3.

Bjargarmótið var haldið um síðustu helgi og voru Freyja og Kata fulltrúar Litlu-Brekku á því móti.  Freyja mætti að sjálfsögðu á Litlu-Jörp en Kata með Eldingu og gekk þeim báðum vel. Kata og Elding eru að ná vel saman þannig að Gjafar varð eftir heima í þetta skiptið.  Þetta var að vanda mjög skemmtilegt mót þar sem sveitungar og félagar úr Framfara komu saman og áttu góðan dag.  Vikuna áður var haldið reiðnámskeið á vegum Framfara sem stelpurnar tóku þátt í en mótið var nokkurs konar endapunktur á því.   Til vinstri er Freyja og Litla-Jörp á Einarsstöðum og Kata og Elding á Bjargarmóti t.h.

  
31. ágúst 2008
 
Hún Syrpa okkar fórst 23. ágúst sl. Hún var í hólfi hjá Kappa frá Kommu og hafði fallið ofan í skurð. Dýralæknir telur að hún hafi hálsbrotnað við fallið.  Fráfall hennar er okkur mikill missir enda var hún í sérstöku uppáhaldi hjá fjölskyldunni. Syrpa var aðalkeppnishross Vignis til nokkura ára og áttu þau farsælan feril að baki. Hún hafði einnig sannað sig sem kynbótahryssa. Í sumar voru sýnd tvö hross undan henni og fóru þau bæði í fyrstu verðlaun. Sámur (8,22) og Skör (8,02). Syrpa var nýköstuð rauðtvístjörnóttum hesti undan Mola frá Skriðu. Sá hefur fengið nafnið Sómi. Hann gengur nú undir annari folaldshryssu og gengur vel að venja hann undir. Auk Sóma eigum við tvö ótamin tryppi undan henni: Spóa 3v.  undan Ofsa frá Brún og Stillu 2v. undan Gígjari frá Auðsholtshjáleigu.

20. ágúst 2008
Brynja hækkaði stökk úr 8,0 í 8,5 í yfirliti sl. mánudag. Hún fór því í 8,18 fyrir hæfileika og 8,14 í aðaleinkun. Prinsessa hækkaði ekki og endaði því með 7,98.

17. ágúst 2008

Þráinn frá Litla-Dal til sölu. Kíkið á sölusíðu.

16. ágúst 2008


Við eigum tvær 4 vetra hryssur, Brynju frá Árbæ og Prinsessu frá Garði, á síðsumarsýningunni á Hellu sem fram fer þessa dagana. Við brugðum undir okkur betri fætinum og skruppum suður til að sjá þær í sýningunni. Ferðafélagar okkar voru þau Anna Guðrún og Arnar í Fornhaga, sem eiga Brynju frá Árbæ með okkur. Brynja (brúna hryssan á myndunum) fór í 8,12 í aðaleinkunn og erum við eigendurnir í  skýjunum með þennan árangur. Prinsessa, (jarpa hryssan á myndunum) sem við eigum í félagi við Guðmund og Enrice í Garði, fékk einnig mjög góðan dóm 7,98. Þessar hryssur standa nú tvær efstar fyrir yfirlit sem fram fer á mánudag. Sýnandi er Erlingur Erlingsson. Myndirnar tók Anna Guðrún.

IS2004286939 Brynja frá Árbæ
Sköpulag: 7,5 - 8,0 - 9,0 - 8,0 - 7,5 - 8,5 - 8,5 - 8,0 = 8,08
Hæfileikar: 8,5 - 8,0 - 6,5 - 8,0 - 9,0 - 8,5 - 6,0 = 8,14
Aðaleinkunn: 8,12      Hægt tölt: 8,5      Hægt stökk: 7,5

IS2004266616 Prinsessa frá Garði
Sköpulag: 7,5 - 8,0 - 8,0 - 8,0 - 8,0 - 8,0 - 8,0 - 8,0 = 7,96
Hæfileikar: 8,5 - 8,0 - 6,0 - 8,0 - 8,5 - 8,5 - 7,0 = 7,99
Aðaleinkunn: 7,98      Hægt tölt: 8,5      Hægt stökk: 7,5
 

13. ágúst 2008
 
Fyrir um viku síðan rákum við tryppin heim, gáfum ormalyf, klipptum hófa og rákum svo stóðið upp í fjall. Við notuðum tækifærið og tókum myndir af nokkrum tryppanna. Hér fylgja myndir af fjórum unghryssum. Á fyrstu myndinni (uppi til vinstri) er Embla IS2007265005 frá Litlu-Brekku. Embla er jörp veturgömul hryssa undan Andvara frá Ey og Esju-Sól frá Litlu-Brekku. Á miðjumyndinni er Saga IS2005256277 frá Hólabaki. Hún er 3ja vetra undan Gígjari frá Auðsholtshjáleigu og Sigurdísi frá Hólabaki. Lengst til hægri er Lygna IS2006265006 frá Litlu-Brekku, 2ja vetra undan Sámi frá Litlu-Brekku og Líf frá Litlu-Brekku. Á neðstu myndinni er veturgömul hryssa, Þöll IS2007258736 frá Hjaltastaðahvammi. Hún er undan Þokka frá Kýrholti og Glennu frá Syðra-Skörðugili.

31. júlí 2008

Við höfun nú selt stóðhestinn Sám frá Litlu-Brekku. Kaupandi er Hestvit ehf. sem er fyrirtæki Hinriks Bragasonar og Huldu Gústafsdóttur í Árbakka. Sámur er 6 vetra gamall. Hann hlaut í vor 8,22 í aðaleinkunn í kynbótadómi og hefur verið að sanna sig sem keppnishestur. Hann hefur nú þegar náð 7,07 í einkunn í fimmgangi og 8,34 í A-flokki. Við óskum nýjum eigendum til hamingju með hestinn. Meðfylgjandi myndir af Vigni og Sámi  tók Anna Guðrún í Fornhaga á úrtöku Léttis fyrir Landsmót.

28.júlí 2008

Á laugardaginn keyrðum við fjögur hross á Kaupangsbakka og riðum þaðan í Bjarg til ömmu Jónínu.  Þar voru afkomendur hennar saman komnir til að grilla og hafa notalega kvöldstund saman.  Kveikt var á heimatilbúnum kyndlum, Ævar þandi nikkuna og ýmislegt brallað.
 

28.júlí 2008

Á fimmtudaginn riðum við í Baugasel í Barkárdal með vinafólki okkar í Glæsibæ og á Björgum og þeirra fylgifiskum :).  Við reynum að komast að minnsta kosti einu sinni á ári í Baugasel og ekki brást veðurblíðan frekar en í fyrri ferðum. Við gistum þar eina nótt og riðum svo aftur heim um hádegi á föstudag.  Fleiri myndir úr ferðinni hér. 

20. júlí 2008
Við höfum verið afspyrnu löt við að setja inn efni á heimasíðuna undanfarið. Hér koma helstu hestafréttir síðustu vikna...Smellið á myndir til að sjá þær stærri...


Stelpurnar tóku þátt í "Æskulýðsmóti Norðurlands" sem haldið var á Melgerðismelum í blíðskaparveðri um helgina. Á laugardeginum var keppt í þrautabraut auk þess sem farin var hópreið um svæðið. Í dag sunnudag var svo keppt í pollaflokki, barnaflokki og unglingaflokki með firmakeppnisformi. Á myndinni lengst til vinstri er Bjarney á Litlu-Jörp að keppa í sérstökum "prinsessuflokki" sem var reyndar utan dagskrár. Fyrir miðju er Kata að keppa í barnaflokki á Eldingu frá Litlu-Brekku. Þær stöllur urðu í fyrsta sæti. Á mynd til hægri er Freyja að bregða á leik með Litlu-Jörp.


Kata og Gjafar stóðu sig vel í barnaflokki á Landsmótinu. Þau hlutu í einkunn 8,15 og voru tveimur sætum frá því að komast í milliriðil. Ekki gekk sem skildi hjá karli föður hennar með þá Þráinn og Sám og eru umræður um það við eldhúsborðið hvort ekki sé rétt að sá gamli fari að leggja hvítu reiðbuxunum og einbeiti sér heldur að hestasveinshlutverkinu :-)


25. júní kastaði Líf fallegri brúnni hryssu undan Álfi frá Selfossi. Sú litla hefur fengið nafnið Leynd. Líf fór í hólf til Tenórs frá Túnsbergi.


Elding fór í kynbótadóm á Dalvík og hækkaði hæfileikaeinkunn umtalsvert frá því á Sauðárkrókssýningunni. Hún er klárhryssa og hlaut 8,5 fyrir tölt, hægt tölt, stökk, vilja og geðslag og fegurð í reið. 8,0 fyrir brokk og fet og 9,0 fyrir hægt stökk. 7,90 fyrir hæfileika og 7,85 í aðaleinkunn. Knapi á Eldingu var Tryggvi Björnsson á Blönduósi. Myndirnar tók Anna Guðrún í Fornhaga.


26. júní 2008

Nú erum við að undirbúa okkur fyrir Landsmótið á Gaddstaðaflötum.  Þrjú hross frá Litlu-Brekku búinu fengu fararleyfi á Landsmót fyrir hönd Léttis. Vignir fer með Sám í A-flokk og Þráinn í B-flokk. Kata fer með Gjafar í barnaflokkinn. Á meðfylgjandi myndum eru Kata og Freyja að skola rykið af keppnishrossunum.

25. júní 2008

Ný hross á söluskrá. Kíkið endilega á Hross til sölu.

24.júní 2008

Hremmsa kastaði rauðblesóttu hestfolaldi undan Þóroddi frá Þóroddstöðum þann 20. júní.  Hann hefur fengið nafnið Haukur.  Freyja átti hugmyndina að þeirri nafngift :).  Dagsgamall fór hann vestur í Skagafjörð en á föstudagskvöldið keyrði Vignir Hremmsu undir Hróð frá Refsstöðum. 

10.júní 2008

Hestfolaldið undan Deríu og Klerki hefur verið nefnt Dani.  Það þótti Nanett, dönsku tamningakonunni, ekki leiðinlegt.

9. júní 2008

Aðfaranótt sunnudagsins kastaði Dería brúnu hestfolaldi undan Klerki frá Bjarnanesi.  Mæðgurnar í Litlu Brekku skunduðu með myndavélina upp í fjallhólfið til að ná myndum af nýköstuðu folaldinu en einn ferðafélaginn þverneitaði að fara yfir ána og því voru teknar myndir af ýmsu öðru í ferðinni í staðinn.  Sumir létu mynda sig við að hoppa yfir eða hinu megin við.  Aðrir vildu frekar láta taka mynd af sér RÉTTU megin við með systrum sínum og Koli sem stillti sér upp eins og hinir.  Fljótlega verður farinn annar leiðangur til að mynda folaldið :).   

8. júní 2008

Á föstudagskvöldið síðastliðið var haldið töltmót á Björgum.  Mótið var kolólöglegt í alla staði og þeim mun skemmtilegra.  Katrín Birna og Vignir tóku þátt, Vignir á Eldingu (t.v.) og Þráni frá Þinghóli (fyrir miðju) og Kata á Gjafari (t.h.).  Þeim gekk bara vel en Vignir var efstur eftir forkeppni á Þráni og endaði einnig efstur.  Frúin mætti með myndavélina, nýbúin á ljósmyndanámskeiði, undir mikilli pressu um að standa sig við myndatökuna.

5. júní 2008
 
Fórum með 3 hross í kynbótadóm á Sauðárkróki í síðustu viku. Vignir sýndi Sám og Eldingu en Bjarni Jónasson sýndi Skör. Sámur hlaut 8,22 í aðaleinkunn, 8,09 fyrir sköpulag og 8,30 fyrir hæfileika. Skör er 5 vetra hryssa, sammæðra Sámi. Hún er efnileg klárhryssa hlaut í aðaleinkunn 8,02 þar af 8,24 fyrir byggingu og 7,88 fyrir hæfileika. Elding hlaut í aðaleinkunn 7,66 þar af 7,78 fyrir byggingu og 7,58 fyrir hæfileika. Þetta var því ánægjuleg útkoma fyrir okkur. Sámur er að hækka um 20 kommur frá síðasta ári og Skör smellir sér í fyrstu verðlaun á sinni fyrstu sýningu. Við tókum því miður engar myndir á sýningunni en hér fylgja nokkar gamlar. Sámur og Vignir lengst til vinstri, þá Skör og Bergur, sem þjálfaði hana í vetur og th. Elding og Nanett.

21. maí 2008

Kata og Freyja tóku þátt í Goðamóti Léttis sem haldið var um síðustu helgi. Kata keppti á Gjafari í fjórgangi og tölti barna og Freyja keppti á Litlu-Jörp í pollaflokki. Kata varð í öðru sæti í fjórgangi og fimmta sæti í tölti. Meðfylgjandi myndir tók Anna Guðrún af Kötu og Gjafari og vinkonunum Pálínu, Silvíu og Freyju.

15. maí 2008

Vignir og Nanett tóku þátt í vormóti Léttis sem haldið var annan í hvítasunnu. Nanett fór með Eldingu og Vignir fór með Sám og nafnana Þráinn frá Þinghóli og Þráinn frá Litla-Dal. Vignir og Sámur náðu öðru sæti í fimmgangi, á eftir Degi frá Strandarhöfði, með einkunina 6,37 í forkeppni og 6,71 í úrslitum. Meðfylgjandi myndir tók Anna Guðrún af þeim félögum. Smellið á myndir til að sjá þær stærri.

8. maí 2008

Þetta er nýtt merki hrossaræktarbúsins í Litlu-Brekku. Hönnuður merkisins er Hugrún Ívarsdóttir á Akureyri.  Huggu er margt til lista lagt eins og sjá má á heimasíðu hennar, www.merkilegt.is  Þessi léttstígi og fallegi gæðingur verður náttúrulega ræktunarmarkmið búsins, engin spurning  :-)

7. maí 2008

Póstur til sölu. Sjá nánar hér.

6. maí 2008
 
Meðfylgjandi myndir eru teknar í gær af Andvaradótturinni Þræðingu frá Glæsibæ II. Þræðing er á fjórða vetur og hefur Nanett verið að temja hana í vetur. Hún er nú farin að stíga tölt á hægri ferð og sýnir falleg tilþrif. Spennandi hestefni, að okkar mati allavega :-) Smellið á myndir til að sjá þær stærri.

5. maí 2008

Fjölskyldan varði laugardeginum í Skagafirði. Þar fór fram sýningin "Æskan og hesturinn" í reiðhöllinnin á Sauðárkróki. Þarna komu saman krakkar frá nokkrum hestamannafélögum á Norðurlandi og voru með æfð atriði af ýmsum toga, ss. sirkus, jafnvægisatriði, boðhlaup, munsturreið ofl. Kata og Freyja tóku þátt í sýningaratriðum Léttis. Enda hafa verið stífar æfingar hjá þeim í reiðhöllinni á Akureyri. Hér má sjá fleiri myndir frá þessum skemmtilega degi.

2. maí 2008

Litla-Brekka tekur þátt í gæðastýrðri hrossarækt. Sjá nánar hér.

12. apríl 2008

Fórum í hrossarekstur inn Hörgárdal í gær með Bjargarbændum. Við erum búin að fara nokkra svona túra í vetur, góð tilbreyting fyrir hesta og menn.

30. mars

Það hefur viðrað vel til útreiða undanfarið. Prinsessa, 4v. Orradóttir, (mynd lengst til vinstri) er að verða reiðfær og búið að fara nokkrum sinnum út veg á henni. Hún er þæg og meðfærileg, skemmtilegt og jákvætt tryppi. Hún velur brokkið en hefur þó sýnt að ganglagið er opið og ábyggilega stutt í töltið. Á miðjumyndinni er Hrói frá Litlu-Brekku. Hrói er foli á fjórða vetur sem við tókum inn í byrjun mars. Hann er undan Blæ frá Múla (Andvarasyni) og Hremmsu frá Borgarhóli og er tryppi nr. 2 sem tamið er undan þeirri hryssu. Hann er nú þessa dagana að taka sín fyrstu skref með knapa á baki. Á myndinni lengst til hægri er Bjarney að prófa Litlu-Jörp, reiðhrossið hennar Freyju.

28. mars 2008

Um síðustu helgi var haldið Stjörnutölt í skautahöllinni á Akureyri. Vignir og Nanett tóku að sér undanreið fyrir töltkeppnina. Vignir sýndi einnig Sám í stóðhestakynningu. Á meðfylgjandi myndum er frá vinstri talið Nanett og Elding, Vignir og Þráinn, Vignir og Sámur. Jónína tók myndina í miðjunni en Anna Guðrún hinar tvær.

17. mars 2008

Skruppum suður á land um helgina til þess meðal annars að kíkja á hryssuna okkar Brynju frá Árbæ sem er í tamningu hjá Erlingi Erlingssyni í Langholti. Virkilega álitleg hryssa þar á ferð. Með okkur á ferð voru Anna Guðrún og Arnar í Fornhaga sem eiga hryssuna með okkur. Anna tók meðfylgjandi myndir af Brynju og Erlingi.

10. mars 2008

Nanett og Vignir tóku þátt í ÍSFIMI sem Þorbjörn Matthíasson og Inga Bára Ingólfsdóttir stóðu fyrir á Leirutjörninni um helgina. Nanett sýndi Eldingu og Gjafar í tölti og Vignir mætti með Þráinn frá Þinghóli í tölt, Sám í stóðhestasýningu og Þráinn frá Litla-Dal í skeið. Þráinn frá Litla-Dal náði fyrsta sæti í 100m skeiði. Vel heppnað og skemmtilegt mót. Anna Guðrún tók meðfylgjandi myndir af Nanett og Eldingu og Vigni og Þráni.

8. mars 2008

Meðfylgjandi myndir eru af Djarfi frá Litlu-Brekku. Djarfur er stóðhestur á fjórða vetur undan Þristi frá Feti og Deríu frá Engimýri. Folinn er einstaklega ljúfur og meðfærilegur. Aðeins er farið að þreifa fyrir tölti og virðist það liggja opið fyrir honum. Hér má sjá fleiri myndir af Djarfi sem teknar eru í dag. 

7. mars 2008

Skruppum í Skagafjörðinn í dag og kíktum í heimsókn til Bergs bónda á Narfastöðum. Hann er að þjálfa fyrir okkur hryssuna Skör frá Litlu-Brekku. Skör er á fimmta vetri undan Nagla frá Þúfu og Syrpu frá Ytri-Hofdölum. Hryssan verður áfram í þjálfun hjá Bergi og er stefnt á að sýna hana í kynbótadómi í vor.

5. mars 2008

Nýtt hross á söluskrá, Perla frá Litlu-Brekku. Kíkið á Hross til sölu.

2. mars 2008
Rákum heim stóðið í dag, klipptum hófa og lúsaböðuðum.

18.2.2007

Vignir og Nanett tóku þátt í Bautatölti í Skautahöllinni á Akureyri um liðna helgi. Vignir sýndi Þráinn og Sám en Nanett mætti með Gjafar. Vel skipulagt og skemmtilegt mót. Meðfylgjandi myndir tók Anna Guðrún. Lengst til vinstri eru Þráinn og Vignir, þá Sámur og Vignir og lengst til hægri er Nanett á Gjafari.  

4.2.2008

Það ríkir sannkallaður vetur á Norðurlandi þessa dagana og langt síðan við höfum séð svona mikinn snjó. Nú er Nanett komin aftur til okkar og hrossunum fjölgar smátt og smátt aftur í hesthúsinu. Rikki í Glæsibæ kom um síðustu helgi og járnaði 5 stykki svo nú eru 11 hross komin á járn. Á meðfylgjandi mynd er Nanett að hringteyma Prinsessu frá Garði, undan Orra frá Þúfu og Menju (Gustsdóttur) frá Garði. Prinsessa er 4 vetra hryssa (fædd 2004) sem við eigum í félagi með Guðmundi og Enrice bændum í Garði í Aðaldal.

24.1.2008

Elding er nú komin á járn eftir nærri tveggja ára hlé. Skeifnaspretturinn var farinn í dag og voru þessar myndir teknar af því tilfefni.

23.1.2008

Þær stöllur Freyja og Litla-Jörp hafa verið nokkuð iðnar við útreiðar á nýju ári.

23.1.2008

Korka er nú seld og lagði af stað til Danmerkur í dag.
 

23.1.2008

12. janúar sl. var haldin folaldasýning Framfara á Björgum í Hörgárdal og uppskeruhátíð félagsins um kvöldið.  Við fórum með 4 folöld en ekkert þeirra náði verðlaunasæti. Aftur á móti átti Sámur tvö afkvæmi í úrslitum, þau Krumma frá Glæsibæ II og Sóleyju frá Litla-Dunhaga. Sóley varð efst í flokki merfolalda. Á myndinni til hægri eru kampakátir hrossaræktendur með verðlaun sín. Talið frá vinstri Arnar í Fornhaga, Þór í Skriðu og lengst til hægri er eigandi Sóleyjar, Jósavin í Litla-Dunhaga.
Á myndinni til hægri eru þeir félagar Vignir og Sámur við vetrarþjálfun í norðan garranum síðasta sunnudag.

28.12.2007

18.12.2007

Nanett okkar var heldur óheppin um daginn. Hún skrapp ásamt dönskum félögum sínum í Hlíðarfjall á snjóbretti.  Ekki vildi betur til en svo að hún datt heldur slysalega og handleggsbrotnaði. Það er svo áleitin spurning hvort Danir eigi eitthvert erindi í
skíðabrekkur :-)  Hún fór því fyrr en ætlað var í jólafrí og stefnir að því að koma aftur til okkar í nýju ári, þegar hún verður klár í slaginn.

12.12.2007

Um síðustu helgi sóttum við hrossin í fjallið fyrir ofan Litlu-Brekku og komum þeim í heimahaga. Þau voru vel á sig komin, feit og pattaraleg. Við gáfum þeim ormalyf og örmerktum þau folöld sem ekki voru þegar merkt. Einnig tókum við DNA sýni úr öllum okkar folöldum.

20.11.2007

Á meðfylgjandi myndum eru stóðhestarnir Djarfur og Sámur. Djarfur er brúnsokkóttur foli á fjórða vetur undan Þristi frá Feti og Deríu frá Engimýri. Djarfur er orðinn ágætlega reiðfær eftir rúmlega mánaðartamningu. Myndir AGG.

17.11.2007

Það hefur verið heldur leiðinlegt veður í dag, norðan átt og snjókoma og hálfgert stórhríðarveður nú seinni partinn. Meðfylgjandi myndir eru teknar um hádegisbil af þeim Húmfaxa og Pipar. Húmfaxi er móvindóttur foli á sjötta vetur, þægur klárhestur með tölti sem við höfum verið að þjálfa nú í haust en er nú kominn í stutt frí. Sá brúni, sem reyndar er stjörnóttur og með leist á hægri afturfæti er ógeltur veturgamall foli undan Hróðri frá Refsstöðum og Prinsessu frá Litla-Dunhaga.

15.11.2007
Við héldum 5 hryssum í sumar og reyndust þær allar fylfullar skv. sónar (fyrir rest). Hryssrnar eru listaðar hér að neðan ásamt tilvonandi feðrum:
Hryssa:                                        Stóðhestur:
Hremmsa frá Borgarhóli             Þóroddur frá Þóroddsstöðum
Dería frá Engimýri                      Klerkur frá Bjarnanesi
Líf frá Litlu-Brekku                     Álfur frá Selfossi
Syrpa frá Ytri-Hofdölum             Moli frá Skriðu
Prinsessa frá Litla-Dunhaga       Stáli frá Ytri-Bægisá
Einnig héldum við gæðingshryssunni Sigurdísi frá Hólabaki í félagi við Björn bónda á Hólabaki, eiganda hryssunnar. Hún fór undir Álf frá Selfossi og eigum við helmingshlut í tilvonandi afkvæmi.

15.11.2007

Moli frá Skriðu. Knapi er                       Syrpa frá Ytri-Hofdölum og Vignir
eigandinn sjálfur Þór Jónsteinsson
Fórum með tvær hryssur, þær Prinsessu og Syrpu, í sónarskoðun í gær. Staðfest var fyl í báðum hryssunum okkur til mikillar ánægju :)
Syrpa var hjá Andvara frá Ey fyrri part sumars en náði ekki að fyljast hjá honum. Því næst fór hún til Mola frá Skriðu og var þar frá því byrjun ágúst og þar til í gær. Dágóður tími það, rúmir þrír mánuðir!
Prinsessa er fylfull við Stála frá Ytri-Bægisá. Stáli er efnilegur 4 vetra foli undan Gusti frá Hóli og Nótt frá Akureyri (8,23). Myndir af Mola og Syrpu tók Anna Guðrún.
 

4.11.2007
 
Það er um það bil mánuður síðan að við tókum inn tryppi í frumtamningu og nokkur eldri hross í þjálfun, alls 15 hross. Yngstu tryppin eru á fjórða vetur og eru undan stóðhestunum Þristi frá Feti, Andvara frá Ey, Hrym frá Hofi og Flóa frá Húsavík, einnig foli á fimmta vetur undan Stæl frá Miðkoti. Tryppin eru öll þæg og flest orðin reiðfær. Á meðfylgjandi myndum, sem teknar eru í dag í sunnan roki, má sjá Nanett á Þræðingu frá Glæsibæ og Vigni á Jaðri. Þræðing er hryssa á 4. vetur frá Rikka og Kristjönu í Glæsibæ II. Hún er undan Andvara frá Ey og Þrá frá Glæsibæ. Þræðing er sammæðra gæðingshryssunni Þrumu frá Glæsibæ II sem var sýnd í þýskalandi nú í haust og hlaut í aðaleinkunn 8,37.

10.10.2007

Það hefur verið heldur rólegt á vefnum hjá okkur undanfarnar vikur enda búið að vera rólegt í hestamennskunni. Nú er hins vegar búið að taka hross á hús, aðallega tryppi á fjórða vetur en einnig nokkur eldri hross. Fyrir rúmri viku síðan kom til okkar dönsk stúlka sem heitir Nanett Kvist og ætlar að vera með okkur í tamningum í vetur. Á meðfylgjandi mynd eru Kata og Nanett á stóðréttum á Melgerðismelum um síðustu helgi.

13.9.2007

Snerpa er komin til Svíþjóðar. Meðfylgjandi myndir tók Katrin Willberg nýr eigandi Snerpu í Svíþjóð.

8.9.2007

Hending heitir þessi brúnskjótta hryssa. Hún er undan Hremmsu frá Borgarhóli og Kletti frá Hvammi. Hremmsa fór undir Þórodd frá Þóroddsstöðum í sumar og var sónarskoðuð líklega fengin. Eigum eftir að láta skoða hana aftur til að fá það endanlega staðfest.

8.9.2007

Árleg Bæjarkeppni Hrossaræktarfélagins Framfara var haldin á dögunum. Hér fylgja nokkrar myndir af mæðgunum í Litlu-Brekku. Lengst til vinstri Freyja og Litla Jörp, í miðju húsfreyjan sjálf Jónína og Gjafar og lengst til hægri Kata og Gjafar. 

6.9.2007

Líf var í hólfi hjá Álfi frá Selfossi og reyndist fylfull skv. sónarskoðun :-)

17.8.2007

9. ágúst kastaði Prinsessa brúnu hestfolaldi undan Mola frá Skriðu og eru myndirnar teknar þegar folinn er 4 daga gamall. Prinsessa er nú í hólfi hjá Gígjari frá Auðsholtshjáleigu.

17.8.2007

Við brugðum okkur á Heimsmeistaramót í Hollandi. Virkilega skemmtilegt mót hjá Hollendingum og vel að öllu staðið. Eitthvað fór nú lítið fyrir myndatökum hjá okkur en smelltum þó nokkrum á sunnudeginum. Lengst til vinstri er Stina hinn norski á stórgæðingnum Jarli frá Miðkrika, sem er sonur Andvara frá Ey eins og flestir vita. Andvari kom feikna sterkur sem gæðingafaðir út úr þessu móti og átti nokkra frábæra fulltrúa. Á myndinni í miðið eru efstu knapar í fimmgangi að ríða heiðurshring eftir verðlaunaafhendingu.

29.7.2007

Síðastliðið sumar hleyptum við úr tjörninni sem hefur verið við húsin í Litlu-Brekku.  Nú er svæðið orðið þurrt og stendur til að fylla upp í það.  Hvenær sem það kemst nú í verk  :).

28.7.2007

Það er gaman að kubba!  Verið er að byggja við íbúðarhúsið okkar, bílskúr og herbergi, alls um 65 fm, og ganga framkvæmdir hratt og vel. Byggt er úr plastkubbum.

23.7.2007

Smellið á auglýsinguna til að sjá hana stærri.

23.7.2007

Á sunnudeginum kepptu Kata (10 ára) á Gjafari í barnaflokki og Freyja (7 ára) á Litlu-Jörp í pollaflokki. Allir fengu verðlaunapening í viðurkenningaskyni í lokin.  Kata og Gjafar eru á myndinni til vinstri og vinkonurnar, Kara Hildur og Freyja, til hægri.

22.7.2007

Fjölskyldan skellti sér á Æskulýðsmót Funa og Léttis um helgina.  Á laugardeginum var þrautabraut fyrir krakkana, hópreið, grill og varðeldur.   Freyja reið á Litlu-Jörp og Kata á Ögn en Bjarney lét sér nægja að gæða sér á sykurpúðum um kvöldið.  Bráðskemmtilegt og vel heppnað mót hjá félögunum sem vonandi verður endurtekið að ári. Meðfylgjandi myndir tók Frúin í Litlu-Brekku á glænýju Olympus 410 myndavélinni sína sem hún er ekki lítið roggin með :)

19.7.2007
 
Hringsmenn héldu skemmtilegt Íslandsmót um síðustu helgi. Vignir keppti á Jaðri og Þráni og gekk þeim félögum ágætlega. Meðfylgjandi myndir tók Arnar bóndi í Fornhaga af Jaðri og Vigni í gæðingaskeiði, opnum flokki, en þeir náðu fimmta sæti í þeirri grein.

17.7.2007

Í nótt fæddist jörp hryssa undan Esju Sól frá Litlu-Brekku og Andvara frá Ey. Myndin lengst til vinstri er tekin um 3 í nótt en hinar myndirnar nú í morgunsárið :)

16.7.2007
 
Sámur frá Litlu-Brekku er til afnota hjá okkur í sumar. Sámur er þjáll og jafnvígur alhliða hestur með frábært geðslag. B: 8,06 - H: 7,98 - A: 8,01.
Verð (tollur og hólfagjald): 25.000 + vsk.
 

16.7.2007
Kíkið endilega á nýja sölusíðu Hrossaræktarfélagsins Framfara.

10.7.2007

Kíkið á sölusíðuna okkar. Ný hross á söluskrá og fleiri væntanleg.

2.7.2007
 
Fjölskyldan brá sér með þrjú hross á Fjórðungsmót á Austurlandi, FM07. Vignir keppti á Jaðri í A-flokki og á Þráni í B-flokki og tölti. Kata keppti á Gjafari í barnaflokki. Heldur var nú veðrið hráslagalegt fyrstu dagana en ekki væsti um okkur í fellihýsinu og hrossin okkar fengu inni í hesthúsi á svæðinu. Um helgina var hinsvegar hið besta veður og mótið vel lukkað. Á myndinni til vinstri er Kata á Gjafari og til hægri er það sjálfur Kalli á þakinu að skemmta mótsgestum.

21.6.2007
   
Freyja (7 ára) eignaðist sinn fyrsta reiðhest á dögunum. Það er jörp hryssa á óræðum aldri sem heitir Litla-Jörp.

21.6.2007
 
Nýfædd brún hryssa undan Líf Ásaþórsdóttur og Sámi Garpssyni frá Litlu-Brekku.

17.6.2007
  
Nýfædd systkyn undan Gígjari frá Auðsholtshjáleigu. Jarpur hestur undan Eldingu Sprotadóttur og brúnstjörnótt hryssa undan Deríu frá Engimýri.

17.6.2007

Síðbúin frétt af kynbótasýningu. Vignir sýndi 2 systkyni undan Syrpu, Sám og Snerpu á kynbótasýningu sem fram fór á Sauðárkróki 2. júní sl. Snerpa (mynd til hægri) hlaut í einkunn B: 7.59 H: 7.54 og í aðaleinkunn 7,56.  Sámur (til vinstri)  hlaut í einkunn B: 8,06 H: 7.98 og í aðaleinkunn 8,01 og þar með farseðil á Fjórðungsmót. Myndirnar tók Anna Guðrún Grétarsdóttir.

17.6.2007

Kata og Gjafar tóku þátt í firmakeppni Léttis á dögunum. Mamman sat stolt í brekkunni og tók þessa mynd. Kata og Gjafar lentu í þriðja sæti.

27.5.2007
      
Þá er fyrsta folald sumarsins í Litlu-Brekku komið í heiminn. Skjótt hryssa undan Kletti frá Hvammi og Hremmsu frá Borgarhóli.

22.5.2007
   
Goðamót Léttis var haldið um síðustu helgi. Kata keppti á Snerpu  frá Litlu-Brekku, dóttir Smiðs frá Miðsitju og Syrpu okkar. Þeim vinkonum gekk bara vel og náðu 5. sæti í tölti barna. Anna Guðrún tók þessar myndir.

22.5.2007
 
Fleiri myndir af Vormóti Léttis. Anna Guðrún tók þessar töltmyndir af Þráni frá Þinghóli og Vigni.

16.5.2007

Þessi 3ja vetra ungfoli, Djarfur frá Litlu-Brekku, er laus til útleigu/láns í sumar. Djarfur er undan Þristi frá Feti og Deríu frá Engimýri. Í ungfolaskoðun sem fram fór í Eyjafirði 2. maí sl. segir, í niðurlagi umsagnar " Djarfur er vel gerður foli að flestu leyti. Hann hefur mjúka yfirlínu og jafnan og fallegan bol. Hálsinn mætti vera hærra settur. Hann hefur góðar hreyfingar á brokki sem lofa góðu rými".
Myndina tók Anna Guðrún Grétarsdóttir þegar ungfolaskoðunin fór fram í hlöðunni á Björgum. Smellið á mynd til að sjá hana stærri.
 

16.05.2007

Opna Norðurlandsmótið 26. og 27. maí á Hlíðarholtsvelli....smellið á myndina til að sjá hana stærri.

06.05.2007
     
Meðfylgjandi myndir af Sámi frá Litlu-Brekku tók Anna Guðrún Grétarsdóttir á Vormóti Léttis sem haldið var í gær á Hlíðarholtsvelli. Sámur er 5 vetra stóðhestur undan Garpi frá Auðsholtshjáleigu og Syrpu frá Ytri-Hofdölum. Hann náði 4. sæti í fimmgangi sem er fínn árangur hjá svo ungum hesti á sínu fyrsta móti. Stefnan er svo að sýna hann í kynbótadómi í vor.  Vignir mætti einnig með Jaðar frá Litlu-Brekku og Þráinn frá Þinghóli. Jaðar náði 5. sæti í forkeppni í fimmgangi og 5. sæti í gæðingaskeiði. Þráinn kom inn í 5-6. sæti í fjórgangi en endaði í 6. sæti í úrslitum.

29.04.2007

Veðrið hefur leikið við menn og skepnur undanfarna daga hér á Norðurlandi. Á Möðruvöllum í Hörgárdal (um 2 km. sunnan við Litlu-Brekku) fór hitastigið mest í 21,8 gráður í dag. Dagurinn var notaður í vorverk og hrossarag. Á meðfylgjandi mynd eru bændur í Litlu-Brekku, Garðar og Vignir að reyna að handsama Hildi, 2 vetra hryssu undan Sámi og Hrifningu. Það hafðist fyrir rest !

20.04.2007

Hrifning frá Litlu-Brekku var sýnd á kynbótasýningu í Herning í Danmörku í dag og hlaut mjög góðan dóm. Fyrir byggingu: 7,78 og fyrir hæfileika 8,41, aðaleinkunn: 8,16. Hæfileikar skiptust þannig: Tölt: 8,5 - brokk: 8,0 - skeið: 8,5 - stökk: 8,5 - vilji og geðslag: 8,5 - fegurð í reið: 8,5 - fet: 7,5 - hægt tölt: 8,0 - hægt stökk: 8,0. Knapi var Daníel Jónsson. Hrifning er undan Ægi frá Móbergi og Hremmsu frá Borgarhóli. Ánægjulegt að fyrsta afkvæmi Hremmsu skuli reynast svona vel. Við óskum eigendum hryssunnar í Danaveldi innilega til hamingju með árangurinn!

03.03.2007
     
Það gengur ekki alltaf eins og maður ætlar.  Hér lentum við í kröppum dansi á heimreiðinni að Þrastarhóli í Arnarneshreppi en bíllinn rann aftur á bak í hálkunni og fimm hestar í kerrunni.  Hestarnir sluppu nokkuð vel og má segja að betur hafi farið en á horfðist!

03.03.2007
Sámur frá Litlu-Brekku  Þráinn frá Þinghóli
Keppni á Mývatn open.  Þráinn frá Þinghóli keppti í tölti og náði 6,50.  Einnig fór Sámur frá Litlu-Brekku í stóðhestakynningu. 

01.03.2007

Vefurinn opnaður. 

  icelandic horse icelandic horses islands hest gelding stallion hingst icelandic horse icelandic horse icelandic horses islands hest gelding stallion hingst icelandic horse  icelandic horse icelandic horses islands hest gelding stallion hingst icelandic horse icelandic horse icelandic horses islands hest gelding stallion hingst icelandic horse  icelandic horse icelandic horses islands hest gelding stallion hingst icelandic horse icelandic horse icelandic horses islands hest gelding stallion hingst icelandic horse álfur frá selfossi álfur frá selfossi álfur frá selfossi álfur frá selfossiálfur frá selfossi álfur frá selfossiálfur frá selfossi álfur frá selfossi

Senda póst
til okkar



 

Litla-Brekka, Arnarneshreppi, Eyjafirði - IS601 Akureyri, Iceland Tel. +354 461-4933 Mobil. +354 896-1838
Vefstjórar: Vignir og Jónína
Vefhönnun:  Anna Guðrún Grétarsdóttir